Астанадағы alem.ai халықаралық жасанды интеллект орталығында NVIDIA компаниясының негізін қалаушы әрі бас директоры Дженсен Хуангпен кездесу өтті. Кездесу Qazaq AI Research University (QAIRU) алаңында ұйымдастырылды. Жиында Қазақстанның ғылым және жоғары білім министрі Саясат Нұрбек елдің жасанды интеллект саласындағы әлеуетін, жоғары білім беру жүйесін цифрлық жаңғырту нәтижелерін таныстырып, NVIDIA компаниясымен ынтымақтастықты кеңейту жөніндегі ұсыныстарын ұсынды.
Басты бастамалардың бірі Қазақстанда NVIDIA компаниясының физикалық жасанды интеллект пен модельдеу технологияларына арналған өңірлік орталығын құру болды. Орталық NVIDIA Physical AI Hub in Central Asia деп аталады. Оның мақсаты университеттердің білім беру және ғылыми-зерттеу әлеуетін, NVIDIA компаниясының технологиялық мүмкіндіктерін және экономиканың нақты секторындағы қажеттіліктерді бір арнаға тоғыстыру.
Физикалық жасанды интеллект (Physical AI) – интеллектуалды жүйелерді нақты әлемде қолдануға бағытталған, болашағы зор салалардың бірі. Бұл технологиялар физикалық үдерістерді модельдеуге, роботтық жүйелерді үйретуге, инженерлік шешімдерді виртуалды ортада сынауға және өнеркәсіп нысандарының цифрлық көшірмелерін жасауға мүмкіндік береді.
Ынтымақтастықтың негізгі бағыттарының бірі NVIDIA Deep Learning Institute (DLI) білім беру бағдарламасын дамыту болмақ. Бастапқы кезеңде Қазақстанның 12 техникалық жоғары оқу орнының өкілдері осы бастамаға қатысты. Ал төрт оқытушы NVIDIA DLI елшісі мәртебесін алды. Олар халықаралық білім беру тәжірибесін таратуға, практикалық сабақтар өткізуге және студенттердің жеделдетілген есептеулер, деректерді өңдеу мен жасанды интеллект салаларындағы білімін тереңдетуге үлес қоса алады.
Алдағы уақытта NVIDIA DLI Ambassador бағдарламасының аясын кеңейтіп, оған 100-ден астам университетті тарту ұсынылып отыр. Бұл бағытта оқытушыларды даярлау және сертификаттау, NVIDIA әзірлеген оқу материалдарын жергілікті білім беру жүйесіне бейімдеу, сондай-ақ мамандандырылған курстарды қазақстандық жоғары оқу орындарының білім беру бағдарламаларына енгізу көзделген.
NVIDIA Physical AI Hub орталығын QAIRU базасында қазақстандық университеттердің, шетелдік жоғары оқу орындары филиалдарының және технологиялық серіктестердің қатысуымен құру жоспарланып отыр. Орталық аясында NVIDIA DLI бағдарламасының өңірлік алаңын ашу, университеттер жанындағы зертханалар желісін қалыптастыру және өнеркәсіп кәсіпорындарымен бірлесіп NVIDIA Omniverse пен Isaac платформалары негізінде әзірлемелерді жасауға және сынауға арналған алаңдар ұйымдастыру қарастырылған.
Орталық жұмысының басым бағыттарына тау-кен өнеркәсібі, энергетика және көлік салаларына арналған цифрлық көшірмелер жасау, робот техникасы мен автономды жүйелерді дамыту, сондай-ақ физикалық және өнеркәсіптік жасанды интеллект салаларында жұмыс істейтін инженерлер мен зерттеушілерді даярлау кіруі мүмкін.
Студенттердің инженерлік командаларын кәсіпорындардың нақты міндеттерін шешуге тартуға да ерекше мән беріліп отыр. Университет зертханалары жаңа үлгілерді сынақтан өткізуге, өндірістік үдерістерді модельдеуге және кейін өндіріске енгізіп, коммерцияландыруға болатын технологияларды әзірлеуге арналған алаңға айналуы мүмкін.
Бұл бастаманы жүзеге асыру мамандар даярлауды, ғылыми зерттеулерді және технологияларды өнеркәсіпте қолдануды біртұтас жүйеге біріктіруге мүмкіндік береді. Алдағы уақытта орталық физикалық жасанды интеллект саласындағы құзыреттерді дамытуға және қазақстандық технологиялық шешімдерді Орталық Азия нарығына шығаруға бағытталған өңірлік алаңға айналуы ықтимал.
Қосымша материалдар мен сараптамалық шолуларды біздің Telegram арнамыздан оқуға болады.
