Әділет министрлігі Жасанды интеллект және цифрлық даму министрлігімен бірлесіп, қолданыстағы сервистердегі мәселелерді шешуге, нотариаттық әрекеттердің ашықтығын арттыруға және олардың орындалуын бақылауды күшейтуге бағытталған E-Notary цифрлық платформасын іске қосады. Бұл туралы inbusiness.kz Қазақстан Республикасы Үкіметінің баспасөз қызметіне сілтеме жасап хабарлады.
Платформада нотариустың әрбір әрекеті тіркеліп қана қоймай, нотариустар мен азаматтарды биометриялық сәйкестендіру жүйесін біріктіру де алғаш рет қарастырылған. Бұл есептік деректерді заңсыз пайдалануға жол бермей, ақпараттық қауіпсіздік деңгейін едәуір арттыруға мүмкіндік береді.
Процеске қатысушылар үшін жеке кабинет ашылады. Азаматтар осы бөлім арқылы өздерінің қатысуымен жасалған барлық нотариаттық әрекеттерді қадағалап, қажет болған жағдайда оларға қарсылық білдіре алады.
Атқарушылық жазба жасауға берілген өтініштерді нотариустар арасында автоматты түрде бөлу тетігі де енгізіледі. Бұл мамандардың жұмыс жүктемесін тең бөлуге, өндіріп алушының нотариусты өз қалауынша таңдау мүмкіндігін жоюға және олардың өзара сөз байласу қаупін азайтуға мүмкіндік береді.
E-Notary платформасында ұсынылған құжаттарды талдау, ықтимал тәуекелдерді анықтау және тиісті ұсынымдар әзірлеу үшін жасанды интеллект құралдары қолданылады. Соған қарамастан барлық нотариаттық әрекеттерді жасау жөніндегі түпкілікті шешім тек нотариустың құзырында қалады.
Жүйені пилоттық режимде сынақтан өткізудің қорытындысы бойынша платформаны 2026 жылдың соңына дейін елдің барлық аумағында енгізу жоспарланып отыр.
Қосымша материалдар мен сараптамалық шолуларды біздің Telegram арнамыздан оқуға болады.
