Ғалымдар ара шаруашылығын есепке алуға, ара тұқымын асылдандыру жұмыстарын жетілдіруге және олардың генетикалық қорын сақтауға мүмкіндік беретін Apislab цифрлық платформасын әзірледі, деп хабарлайды DKNews.kz. Қазіргі таңда бұл жүйені еліміздің әр өңіріндегі 201 шаруашылық пайдаланып отыр. Осылайша омартадағы күнделікті жұмыс цифрлық ортаға көшіп, қажетті мәліметтерді телефонмен басқаруға мүмкіндік туды.
Жаңа платформаны Ұлттық аграрлық ғылыми-білім беру орталығының (ҰАҒБО) ғалымдары әзірлеген.
Жоба ара шаруашылығындағы асылдандыру ісін тиімді басқаруға арналған технологияларды әзірлеу жөніндегі мемлекеттік бағдарлама аясында жүзеге асырылды.
Жобаның негізгі мақсаты – ғылыми зерттеулер мен омарта шаруашылығында күнделікті атқарылатын жұмыстарды біртұтас цифрлық жүйеге біріктіру.
Apislab қандай мүмкіндіктер ұсынады?
Платформа өзара байланысты үш цифрлық сервистен тұрады.
Apislab Science аралардың қанаттарының цифрлық кескіндерін талдап, алынған мәліметтер негізінде олардың ерекшеліктерін зерттеуге мүмкіндік береді. Сонымен қатар сервис ғылыми зерттеулердің нәтижелерін жинақтап, сақтауға арналған.
Apislab Apiary омарталар, ара ұялары, ара аналықтары және өндірістік үдерістер туралы толық есеп жүргізуге мүмкіндік береді.
Apislab Mobile омартадағы жұмысты смартфон арқылы жүргізуге мүмкіндік береді. Омарташы осы сервис арқылы ара ұяларын тексеріп, асылдандыруға қажетті белгілерді тіркей алады. Жиналған мәліметтер бірден ортақ деректер қорына енгізіледі. Сонымен қатар әр ара ұясы QR-код арқылы цифрлық жүйеде тіркеледі. Кодты сканерлеу арқылы ұяға қатысты бұрын енгізілген мәліметтердің барлығын көруге болады.
Платформадағы маңызды мүмкіндіктердің бірі – әр ара ұясы туралы деректі цифрлық жүйеде сақтауға болады.
Енді әр ара отбасына жеке нөмір мен QR-код беріледі. Кодты смартфон арқылы сканерлеу арқылы белгілі бір ара отбасының толық тарихын көруге болады. Оның ішінде жүргізілген тексерулердің нәтижелері, асылдандыру көрсеткіштері және басқа да қажетті мәліметтер сақталады. Бұл тәсіл омарташыларды қағаз журнал жүргізу қажеттілігінен арылтып, ақпараттың жоғалу қаупін азайтады.
Әзірлеушілер Apislab платформасын толықтай тегін пайдалануға мүмкіндік жасаған. Шаруашылық тіркелгеннен кейін пайдаланушылар жүйедегі барлық негізгі құралдарға қол жеткізе алады. Олар:
- омарталардың цифрлық есебін жүргізуге;
- электрондық журналдарды пайдалануға;
- мобильді қосымша арқылы жұмыс істеуге;
- араларды асылдандыру жұмыстарын жүргізуге арналған сервистерді қолдануға мүмкіндік береді.
Қазақстанға бұл не үшін қажет?
Ара шаруашылығы біртіндеп цифрлық ауыл шаруашылығының құрамдас бөлігіне айналып келеді. Бұл бағытта цифрлық технологияларды қолдану өндірістік үдерістерді жүйелеуге ғана емес, аралардың генетикалық ерекшеліктері туралы мәліметтерді жинақтап, оларды ұзақ мерзімде сақтауға да мүмкіндік береді.
Әзірлеушілердің пікірінше, Apislab платформасын енгізу бірнеше маңызды нәтижеге қол жеткізуге мүмкіндік береді. Атап айтқанда, ол:
- араларды асылдандыру жұмыстарының тиімділігін арттырады;
- бал араларының генетикалық қорын сақтауға ықпал етеді;
- ғалымдар мен омарташылар арасында мәлімет алмасуды жеделдетеді;
- омарталарды басқару ісін заманауи әрі ыңғайлы етуге мүмкіндік береді.
Қосымша материалдар мен сараптамалық шолуларды біздің Telegram арнамыздан оқуға болады.
