Маусым айының алғашқы аптасы технология саласы үшін маңызды жаңалықтарға толы болды. Әлемнің әр түкпірінде жасанды интеллект, автоматтандыру және есептеу технологиялары бағытындағы инфрақұрылымдық әрі өнімдік жобаларды дамыту жалғасын тапты. Ірі компаниялар құрылғылар экожүйесі мен бағдарламалық платформаларының жаңартылған нұсқаларын таныстырса, мемлекеттер жоғары деңгейде автоматтандырылған технологиялар мен цифрлық экономиканы құқықтық тұрғыдан реттеуге басымдық бере бастады. Соның нәтижесінде бәсекелестік тек технологиялық шешімдер төңірегінде ғана емес, оларды тәжірибеге енгізу қарқыны бойынша да күшейіп келеді.
Алдымен АҚШ-тың Техас штатында жүзеге асырылып жатқан SpaceX компаниясының ауқымды жобасына тоқталайық. Starbase ғарыш айлағында Gigabay құрастыру кешенінің құрылысы қарқынды жүріп жатыр. Нысан 2026 жылдың өзінде пайдалануға беріледі деп жоспарланған. RGV Aerial Photography тәуелсіз бақылаушылары жариялаған соңғы әуе түсірілімдері құрылысшылардың алып ғимараттың қабырғаларын қаптау жұмыстарына кіріскенін көрсетті. Ресми мәліметке сәйкес, ғимараттың биіктігі 116 метр, ұзындығы 110 метр, ені 130 метр болса, ішкі көлемі шамамен 1,3 миллион текше метрді құрайды. Илон Маск бұл өндірістік кешен жылына мыңға дейін Starship жүйесін құрастыруға мүмкіндік береді деп есептейді. Бұл өткен жылы өткізілген бес сынақ ұшырылымынан және компанияның Марс бағдарламасында жүк миссияларының мерзімі ресми түрде ертерек кезеңге ауыстырылғаннан кейін ерекше өзектілікке ие болды.
Ұшқышсыз авиациялық жүйелердің қарқынды дамуы оларды құқықтық тұрғыдан реттеуді қажет етеді. Осыған байланысты Қазақстан Республикасы Парламенті Мәжілісі екінші оқылымда ұшқышсыз ұшу аппараттары мен жоғары деңгейде автоматтандырылған авиациялық жүйелерді пайдалануды реттейтін заңнамалық түзетулер топтамасын қабылдады. Құжат жаңа саланың негізгі инфрақұрылымын құқықтық тұрғыдан айқындап, тікұшақ айлақтарына және қалалық әуе қозғалысына арналған арнайы аумақтарға қойылатын талаптарды белгілейді. Мұндай нормаларды қабылдау қажеттігі 19 мамырда Алатау қаласында өткен бес орындық қытайлық AutoFlight Prosperity аппаратының алғашқы ашық сынақтарынан кейін айқындала түсті. Аталған әуе көлігі бір қуаттаумен 200 шақырымға дейін ұшып, сағатына 200 шақырым жылдамдықпен қозғала алады. Қазақстандық Alatau Advance Air Group компаниясы осындай 50 аппаратты сатып алу жөнінде келісімшарт жасасты. Сонымен қатар Alatau City инфрақұрылымын дамытуға бағытталған жеке инвестициялардың жалпы көлемі шамамен 300 миллион АҚШ долларын құрайды.
Бағдарламалық жасақтама әзірлеушілерінің алдында да ауқымды міндеттер тұр. Бұл Астанада өткен Еуразиялық экономикалық форум барысында тағы бір мәрте айқын көрінді. Форумда вице-министр Дмитрий Мун Еуразиялық экономикалық одақ елдеріне ортақ жасанды интеллект зертханаларының желісін құруды ұсынды. Сессия барысында Қазақстанның ұлттық жасанды интеллект платформасын пайдалану көрсеткіштері де жарияланды. Мемлекеттік қызметшілер оны күнделікті жұмыс міндеттерін орындау үшін бір миллионнан астам рет пайдаланған. Ал азаматтар цифрлық көмекшілердің қызметіне 2,5 миллионнан астам рет жүгінген. Қазіргі таңда негізгі мәселе нақты экономика секторларына қажетті деректердің жеткіліксіздігі болып отыр. Әлеуметтік сала мен медицинада цифрландыру деңгейі 95 пайызға жетсе, өнеркәсіпте бұл көрсеткіш 40 пайызды, ал ауыл шаруашылығында небәрі 26 пайызды құрайды. Жеке тұлғаларды сәйкестендіруге мүмкіндік бермейтін деректермен алмасу және мемлекеттер арасында міндеттерді тиімді бөлу жөніндегі ұсыныс Беларусь, Армения және Қырғызстан өкілдерінің қолдауына ие болды. Олар пилоттық жоба ретінде логистика және құқық салаларына арналған жасанды интеллект көмекшісін іске қосуды ұсынды.
NVIDIA H200 чиптері негізінде екі суперкомпьютерді іске қосу секілді нақты инфрақұрылымдық жобалардың жүзеге асырылуы маңызды нәтижеге жеткізді. Dealroom талдау платформасы Қазақстанды әлемдегі ең қарқынды дамып келе жатқан технологиялық экожүйелердің Rising Stars санатындағы алғашқы ондыққа енгізді. Қазақстан Республикасы Премьер-министрінің орынбасары Жаслан Мәдиевтің айтуынша, бұл рейтингке ену халықаралық инвесторлар мен венчурлік қорлар үшін нарықтың ашықтығы мен тартымдылығын арттырады. The Global Tech Ecosystem Index 2026 рейтингі 77 елдегі 325 қаланы қамтиды. Бағалау барысында тартылған инвестициялар көлемі, компаниялардың нарықтық құны, патенттер саны, сондай-ақ жергілікті жалпы ішкі өнім мен өмір сүру құны ескеріледі.
Аптаның халықаралық деңгейдегі ең маңызды технологиялық оқиғаларының бірі Тайбэй қаласында өткен Computex 2026 көрмесі болды. Бұл беделді іс-шараға қатысқан порталымыздың тілшісі көрмеде ұсынылған инновациялық жаңалықтар жөнінде бірнеше жан-жақты шолу әзірлеген болатын. ASUS компаниясы ойыншыларға, кәсіпқой мамандарға және корпоративтік пайдаланушыларға арналған жаңа шешімдерін таныстырып, ROG брендінің жиырма жылдығын атап өтті. Көрменің басты жаңалықтарының бірі ROG Xbox Ally X20 портативті ойын консолі болды. Құрылғы алтын түсті әрлеу элементтері бар жартылай мөлдір қара корпуспен жабдықталған. Сондай-ақ онда жаңарту жиілігі 120 Гц, жарықтылығы 1400 нитке дейін жететін 7,4 дюймдік ROG Nebula HDR OLED дисплейі, AMD Ryzen AI Z2 Extreme процессоры, 24 ГБ жедел жады және көлемі 1 ТБ болатын деректер жинақтау құрылғысы орнатылған. Сонымен қатар ROG XREAL R1 Edition 20 кеңейтілген шынайылық көзілдірігі де таныстырылды.
Мерейтойлық құрылғылардың ішінде ерекше назар аудартқаны – дизайны үшін алтын жүлдеге ие болған ROG G1000 Edition 20 ойын компьютері. Ол AMD Ryzen 9 9950X3D процессорымен, ROG Astral RTX 5090 бейнекартасымен, 128 ГБ DDR5 жедел жадымен және әлемде алғаш рет қолданылған AniMe Holo голографиялық желдеткіш жүйесімен жабдықталған. Мониторлар қатарында жаңарту жиілігі 540 Гц, жауап беру уақыты 0,02 миллисекунд болатын ROG Strix OLED XG259QWPG Ace және QHD 540 Гц пен HD 720 Гц режімдерін қолдайтын мерейтойлық ROG Swift OLED PG27AQWP-G Edition 20 модельдері көпшіліктің назарын аударды.
ASUS кәсіби пайдаланушылар мен цифрлық контент әзірлеушілерге де ерекше көңіл бөлді. Компания 4K ажыратымдылықтағы QD-OLED панельдерімен жабдықталған ProArt Display OLED PA32USD, PA279CDV және PA329CDV мониторларын, салмағы 500 грамнан аспайтын ZenScreen OLED MQ14FCKV тасымалды OLED дисплейін, сондай-ақ қос экранды ZenScreen Duo MB14FCD құрылғысын таныстырды. Бұл шешімдер Computex 2026 көрмесіндегі басты үрдістердің бірін айқын көрсетті. Яғни ойынға арналған, кәсіби және тасымалды құрылғылар арасындағы айырмашылық барған сайын азайып келеді.
Таныстырылымның елеулі бөлігі жасанды интеллект технологияларына арналды. ASUS жұмыс үдерістерін автоматтандыруға арналған Agentic AI платформасын көрсетті. Бұл жүйе кездесулердің қорытындысы бойынша жазбалар әзірлейді, презентациялардың бастапқы нұсқаларын дайындайды, тапсырмалардың орындалуын бақылайды және белгілі бір тақырыптар бойынша жаңалықтарды іріктейді. Кейіннен осы мүмкіндіктер компанияның жаңа ноутбуктерінде одан әрі жетілдіріліп, күнделікті жұмыс барысында тікелей пайдалануға бейімделген.
Іскерлік сегментке арналған өнімдер қатарында ExpertBook B5 Flip G2 және ExpertBook P5 G2 ноутбуктері таныстырылды. Бірінші модель 2,5K ажыратымдылықтағы айналмалы дисплеймен, кіріктірілген стилуспен, Wi-Fi 7 қолдауымен жабдықталған және салмағы 1,31 килограммды құрайды. Екінші модель жасанды интеллектке негізделген қосымшалармен жұмыс істеуге арналған. Ол Intel Core Ultra 7 және AMD Ryzen AI 9 HX процессорларымен жабдықталып, нейрондық есептеу модульдерінің өнімділігі 55 TOPS-қа дейін жетеді. Екі құрылғы да корпоративтік деңгейдегі деректерді қорғау және құрылғыларды басқару құралдарымен толықтырылған.
Жаппай тұтынушылар нарығына ASUS Copilot+ PC технологиясын қолдайтын жаңартылған Zenbook және Vivobook ноутбуктерін, 12,2 дюймдік 2.8K экраны және жаңарту жиілігі 144 Гц болатын Pad T32201 планшетін, өнімділігі 180 TOPS-қа дейін жететін NUC 16 Pro шағын компьютерін, сондай-ақ деректерді беру жылдамдығы 19 Гбит/с-қа дейін жететін Wi-Fi 8 стандартына негізделген ZenWiFi BN12 торлы желі жүйесін ұсынды. Сонымен бірге компания кәсіпорындардың ESG көрсеткіштерін талдап, тұрақты даму үдерісін нақты уақыт режимінде бақылауға арналған AI x ESG платформасын таныстырды.
Көрмеде ROG брендінің жиырма жылдығына арналған мерейтойлық іс-шара ерекше орын алды. Edition 20 топтамасына ROG Crosshair X870E Edition 20 аналық тақшасы, ROG Astral GeForce RTX 5090 Edition 20 бейнекартасы, ROG G1000 үстелдік компьютері, ROG NUC 16 шағын компьютері, ойын мониторлары және жаңартылған перифериялық құрылғылар енгізілді. Барлық өнімдер қара және алтын түстер үйлесімінде безендіріліп, брендтің тарихына құрмет білдіретін әрі мерейтойлық топтаманың ерекшелігін айқындайтын ортақ дизайнерлік шешіммен ұсынылды.
ASUS аппараттық жаңалықтармен ғана шектелмей, ROG Lab бастамасын, жаңартылған Armoury Crate Edition 20 платформасын және дәстүрлі компьютерлік жабдықтар аясынан шығатын бірқатар жобаны таныстырды. Олардың қатарында ROG OMNI коллекциялық мүсіншесі мен ROG Saga үстел ойыны бар. Бұл бастамалар компанияның бренд төңірегінде технологияны, ойын-сауықты және пайдаланушылар қауымдастығын біріктіретін біртұтас экожүйе қалыптастыруға ұмтылысын көрсетеді.
ASUS компаниясының PR жөніндегі директоры Влад Захаровпен әңгіме барысында ROG брендінің жиырма жыл ішіндегі даму эволюциясына ерекше назар аударылды. Бастапқыда тек технология әуесқойларына арналған шағын бренд болған ROG бүгінде ойыншыларды ғана емес, цифрлық контент жасаушыларды, бағдарламашыларды және жоғары есептеу қуатын қажет ететін салалардың мамандарын біріктіретін ауқымды экожүйеге айналды. Компания алдағы даму бағыты үш негізгі қағидатқа негізделетінін атап өтті. Олар – экожүйелік тұтастық, икемділік және жасанды интеллект мүмкіндіктерін жан-жақты пайдалану. Мұнда жасанды интеллект жеке функция ретінде емес, жүйелік ресурстарды тиімді бөліп, пайдаланушының күнделікті жұмысындағы жүктемені азайтатын кешенді тетік ретінде қарастырылады.
Бұл ұстаным қазіргі технологиялық саланың жалпы даму бағытын айқын көрсетеді. Бүгінде прогресс жекелеген құрылғылардың немесе жеке функциялардың мүмкіндігімен ғана емес, тұтас экожүйе қалыптастырып, интеллектуалды технологияларды күнделікті өмірге тиімді енгізу қабілетімен бағаланатын кезеңге қадам басты.
