Қазақстанның Денсаулық сақтау министрлігі мектеп оқушыларына жүргізілетін профилактикалық медициналық тексеру жүйесін жаңғыртуды жоспарлап отыр. Реформаның негізгі бағыты — цифрлық технологияларды енгізу мен диагностиканың сапасын арттыру. Ведомство өкілдерінің пікірінше, қазіргі қолданыстағы жүйе көбіне формалды сипатта қалып, балалар денсаулығындағы ауытқуларды дер кезінде әрі тиімді анықтауға толық мүмкіндік бермейді.
Мектеп медицинасын реформалау жоспары туралы Денсаулық сақтау министрлігінің баспасөз қызметі аппараттық кеңестің қорытындысы бойынша мәлімдеді. Министрлік ұсынған мәліметке сәйкес, бүгінгі таңда профилактикалық тексерулер көбіне сандық көрсеткіштерге бағдарланған, ал диагностиканың сапасы жеткілікті деңгейде емес.
Ана мен бала денсаулығын сақтау департаментінің директоры Мағрипа Ембергенова атап өткендей, негізгі мәселелердің бірі — бейінді мамандар тапшылығы мен медицина қызметкерлеріне түсетін жүктеменің шамадан тыс артуы.
Мағрипа Ембергенованың айтуынша, тар бейінді мамандардың жетіспеушілігі мен медицина қызметкерлерінің жоғары жүктемесі бір баланы қарауға бөлінетін уақыттың қысқаруына, үстірт диагностикаға және денсаулықтағы бұзылыстарды анықтау деңгейінің төмендеуіне әкеліп отыр. Сонымен қатар ерекше білім беру қажеттілігі бар балалар мен мүгедектігі бар балаларды есепке алу жүйесінің жеткіліксіздігі де өзекті мәселелердің бірі ретінде қарастырылуда.
Қалыптасқан жағдайды өзгерту мақсатында министрлік профилактикалық тексеру жүйесін кешенді түрде реформалауды ұсынады. Жаңа бастама аясында тексеру нәтижелерін өңдеуге цифрлық технологиялар енгізіліп, бірқатар функцияларды орта буын медицина мамандарына беру көзделіп отыр.
беру ұйымдарын заманауи медициналық құрылғылармен жабдықтау жоспарланып отыр. Атап айтқанда, мектептерге цифрлық электрокардиографтар, пульсоксиметрлер, бой мен салмақты өлшейтін құрылғылар, құлақ қуысын тексеруге арналған аспаптар және деректерді автоматты түрде жіберетін телемедициналық кешендер орнатылуы мүмкін.
Алдағы уақытта мектептер ауыз қуысының ішкі бөлігін тексеруге арналған камералармен, плантографтармен және авторефрактометрлермен де жабдықталуы мүмкін.
Реформаның негізгі тетіктерінің бірі — баланың электронды денсаулық паспортын қалыптастыру болмақ. Профилактикалық тексерулер барысында жиналған барлық мәлімет Денсаулық сақтау министрлігінің ақпараттық жүйелерімен біріктіріледі деп жоспарлануда.
Қазақстан Республикасының Денсаулық сақтау министрі Ақмарал Әлназарова жаңартылған мектеп медицинасы үлгісін 2026 жылғы 1 қыркүйектен бастап еліміздегі барлық мектепте кезең-кезеңімен енгізуді тапсырды.
Айсұлу Басенова
Қосымша материалдар мен сараптамалық мақалаларды MobiLaser Telegram арнасынан оқуға болады.
