Оңтүстік Кореядағы білім беру қорын басқаратын қамқоршылар кеңесінің төрағасы Сонг Кёнг Ким Қазақстанның жоғары білім мен цифрлық технологиялар саласындағы дамуын жоғары бағалады. Оның айтуынша, Түркістанда ашылған кореялық университеттің филиалы болашақ мамандарды даярлауда маңызды рөл атқарады.
Сонг Кёнг Ким бұл жобаның жүзеге асуына Қазақстан Президенті мен Үкіметінің қолдауы әсер еткенін атап өтті. Осы қолдау өңір жастарына әлемдік деңгейдегі білім алуға жол ашты.
Оның сөзінше, Түркістан облысының және өзге аймақтардың жастары жасанды интеллект, деректерді талдау және цифрлық технологиялар саласында кәсіби білім алуға мүмкіндік алып отыр. Бүгінде мұндай бағыттар әлемдік экономикадағы негізгі қозғаушы күшке айналып келеді.
Түркістандағы филиал халықаралық тәжірибеге негізделген екі кезеңдік оқу моделін жүзеге асырады. Алғашқы екі жыл білім Қазақстанда беріледі, келесі екі жыл Кореяда немесе шетелдегі серіктес университеттерде жалғасады. Бағдарламаны тәмамдаған түлектер бір уақытта қазақстандық және кореялық диплом алады.
Қазіргі таңда филиалда еліміздің сегіз өңірінен келген 108 студент білім алуда. Көпшілігі Түркістан облысы әкімдігі бөлген мемлекеттік грант иегерлері.
Сонг Кёнг Кимнің айтуынша, бұл бастама Қазақстанның білім саясатының басымдықтарымен үндес, яғни практикалық дайындыққа ден қою, халықаралық білім кеңістігіне ықпалдасу және бәсекеге қабілетті мамандарды қалыптастыру.
Ол Қазақстанның бүгінгі таңда цифрлық дәуір мамандарын тәрбиелеп жатқанын, мұның еліміздің білімді экономика құру жолындағы сенімді қадамы екенін айтты.
