Абай облысында 9 сынып оқушысы сыбайлас жемқорлыққа қарсы компьютерлік ойын жасап шығарды
«Сатылмайтын Алпамыс» деп аталатын ойын барысында ойыншылар құпия агент немесе журналист рөлін таңдап, сот, прокурор және мемлекеттік қызметшілердің заңсыз әрекеттерін әшкерелеуге ұмтылады. Автордың айтуынша, ойынның финалы ерекше: басты кейіпкер үлкен қылмыстық жүйені әшкерелей алады. Айта кетейік, ойын желісі нақты оқиғалар негізінде жазылған.
Ойынның ааторы, 9-сынып оқушысы Нурали республикалық сыбайлас жемқорлыққа қарсы жобалар байқауында жеңімпаз атанып, 1 миллион теңге сыйақы алды. Бұл қаражатты ол өзінің жобасын әрі қарай дамытуға жұмсауды жоспарлап отыр. Оқушы «Сатылмайтын Алпамыс» ойынын үш тілде тегін мобильді қосымша ретінде ұсынуды көздеп отыр. Қазіргі уақытта ол VR-көзілдірігі мен арнайы жабдық сатып алып, ойынның қызықты әрі тартымды болуына жұмыс жасауда.
Нурали келесі жаңартуларда ойынның әр кезеңіне Абайдың «Қара сөздерінен» нақыл сөздер енгізуді көздеп отыр. Қосымша қазірдің өзінде оның мектебінде құқық негіздері пәнінде сынақтан өткізілуде. Сабақ барысында оқушылар заң қорғаушының рөлін ойнап, белсенділік танытуда.
