«Аркейн» анимациялық сериалының екінші маусымы мен оның финалы.
Кино саласында ойынның экранизациясы сәтсіздікке ұшырайды деген пікір қалыптасқан. «Жауыздық мекені» (Обитель зла) мен «Сайлент Хилл» секілді кей фильмдер табысты болғанымен, «Варкрафт» пен «Ассасиннің сенімі» (Кредо убийцы) сынды жобалар көрермен үмітін ақтай алмады. Сондықтан 2021 жылдың қарашасында «Аркейн» анимациялық сериалының алғашқы сериялары шыққанда, көптеген киносыншылар сериялды елеусіз қалдырды.
Алайда, алғашқы үш бөлімнен тұратын акт жарық көрген соң, бұл көзқарас түбегейлі өзгерді. Сериал тек League of Legends ойынының жанкүйерлеріне ғана емес, ойыннан бкйхабар көрермендерге де қызықты болып шықты. Оның басты ерекшелігі – ойын туралы ешқандай біліміңіз болмаса да, сюжетке ену оңай.
League of Legends – 2009 жылы Riot Games компаниясы әзірлеген MOBA жанрындағы көпқолданушыға арналған компьютерлік ойын. Онда екі команда, әрқайсысы бес ойыншыдан тұрады, арнайы картада бір-біріне қарсы тұрады. Әр ойыншы ерекше қабілеттері мен қасиеттері бар «чемпионды» басқарады.
«Аркейн» ойында негізделген жобалардың да жоғары деңгейде орындалуы мүмкін екенін дәлелдеп, экранизацияға деген көзқарасты өзгертті.
Riot Games, Fortiche және Netflix бірлесіп, соңғы жылдардың ең әсерлі анимациялық сериалдарының бірін дүниеге әкелді.
Сериалдың басты жетістіктерінің бірі — ерекше кейіпкерлер мен әсерлі саундтректер. Анимациясы өз алдына жеке өнер туындысы іспеттес, әрбір сәті тиянақты ойластырылған. Техникалық жағы да таңдай қақтырады: графикасы шынайы әрі әсерлі. Мысалы, қылыш ұшқындары мен жарылыс толқындары сияқты визуалды эффектілер сериалдың стильді бейнесін толықтыра түседі. Қоршаған орта мен кейіпкерлердің бір кадрда үйлесімді көрінуі де ерекше назар аударарлық.
Сериал жасаушылары сюжет, кейіпкерлер және визуалды жағын тең дәрежеде үйлестіре білген. Оқиға желісіндегі кейбір болжамды жайттарға қарамастан, көрерменді баурап алады. Сюжет тек League of Legends жанкүйерлеріне ғана емес, бұл әлемнен бейхабар жандарға да түсінікті болуы сериалдың кең аудиторияны қамтуына мүмкіндік берді.
“Аркейн” анимациялық сериалының алғашқы маусымы қоғам арасында үлкен қызығушылық туғызды. Көрермендер мен сыншылардан жоғары баға алып, тоғыз «Энни» және төрт «Эмми» жүлдесіне ие болды, 2021 жылдың ең үздік сериалдары тізімін бастады.
Алғашқы маусым аяқталған соң, көрермендер тек екінші маусымның қашан шығатынын білгісі келді.
Үш жылдық үзілістен кейін екінші маусым шықты. Рейтинг көрсеткендей, осы уақыт аралығында сериалды ешкім ұмытпады, керісінше көпшілік оны асыға күткен.
Екінші маусым – бірінші маусымның тек жалғасы емес, көркемдік және эмоционалдық тұрғыдан жаңа биіктікке көтерілген туынды. Fortiche және Riot Games студиялары үш жылда өз шеберліктерін одан әрі жетілдіріп, бүкіл индустрияға жаңа стандарттар ұсынды.
Екінші маусым әртүрлі көзқарастар мен мінез-құлықтарды қарсы қоя отырып, негізге алынған дуализмді тереңірек зерттеуді жалғастырады. Кейіпкерлердің тағдыры көрерменді бей-жай қалдырмайды, ал визуалды стиль олардың эмоцияларын дәл көрсетеді.
Екінші маусымда авторлар драматизмді арттырып, оқиғаны кеңейте түсті. Әсіресе, визуалдық шешімдер жоғары деңгейде болды: әр кадр – өзінше бір өнер туындысы. Сериал авторлары жасанды интеллектіні қолданудан бас тартып, барлық жұмысты қолмен орындағаны бұл туындының құндылығын арттыра түсті.
«Аркейн» – өзін іздеу туралы сериал. Кейіпкерлер ішкі және сыртқы дағдарыстарға тап болып, өмірлік құндылықтарын қайта қарауға мәжбүр. Екінші маусымның финалы көрермендерді қатты әсерге бөледі: әрбір эмоция шегіне жеткізілді.
Алайда, көпшілікке кейбір сюжет желілері қысқа мерзімде толық ашылмағандай көрінді. Тоғыз серияға тым көп оқиға сыйғызылғандықтан, кейде дем алуға уақыт жетпей қалғандай әсер қалдырады.
Екінші маусымның барлық тоғыз сериясы көрермен тарапынан 9 балдан жоғары ұпаймен бағаланды.
«Аркейннің» екінші маусымы ең жоғары деңгейде аяқталды: сериал мен «Лига легенд» жанкүйерлері соңғы эпизодты көріп, барлық эмоциялық спектрді сезінді. Дегенмен, шоураннерлердің соңғы титрлардан кейін қалдырған әсері көптеген көрермендердің жүрегіне терең із қалдырды.
«Аркейн» – бұл жанрдағы кез келген бәсекелестерін көлеңкеде қалдырып, сапа деңгейін қол жетпейтін биікке көтерген аудиовизуалды эталон туынды. Егер сіз әлі көрмесеңіз, міндетті түрде көріңіз. Соңғы сериялар 23 қарашада шықты, ал сериал қазақ тіліне аударылмаса да, орыс тілінде толық дубляжбен қолжетімді.
