Қазақстанда жаңа бейнемониторинг жүйесі жұмыс істей бастады. Бұл инновациялық жоба ішкі істер министрлігі, ұлттық қауіпсіздік комитеті және цифрлық даму, инновациялар және аэроғарыш өнеркәсібі министрлігінің бірлескен еңбегінің нәтижесі. Жасанды интеллект негізінде жасалған бұл жүйе құқық бұзушылықтарды алдын ала анықтап, қоғамдық қауіпсіздікті қамтамасыз етуде маңызды рөл атқармақ.
Жүйе іздеудегі адамдарды анықтап, қоғамдық орындарда қалдырылған күдікті заттарды тіркеуге, сондай-ақ құқық бұзушылықтарды автоматты түрде анықтауға мүмкіндік береді. Сонымен бірге, ол көлік құралдарын түсі және моделі бойынша тез сәйкестендіріп, қажетті деректерді ұсынады.
Қазіргі таңда бұл жүйе теміржол вокзалдары, әуежайлар, көшелер, қонақүйлер, қиылыстар және ірі сауда орталықтарында қолданылып жатыр.
Астана қаласында өткен Дүниежүзілік көшпенділер ойындары барысында жаңа жүйенің тиімділігі дәлелденді. Жоғалған балалар жедел табылып, іздеуде жүрген бірнеше адам анықталды.
Елордада бейнемониторингтің көмегімен 46 құқық бұзушы ұсталды. Алматыда да осындай жұмыстар жүргізіліп, 30-дан астам құқық бұзушы анықталып, құрықталды.
Бұл жаңа жүйе Қазақстанда қауіпсіз және заманауи өмір сүру ортасын қалыптастыру жолындағы елеулі қадамдардың бірі саналады. Қытай, Еуропа және Ресей елдерінің үздік тәжірибелеріне сүйене отырып бейімделген бұл технология қоғамдық қауіпсіздікті жаңа деңгейге көтеруге мүмкіндік береді. Алдағы уақытта камералар санын көбейтіп, жүйені одан әрі кеңейту жоспарланып отыр.
Қазақстанда 1,3 миллионнан астам бейнебақылау камерасы бар, оның 310 мыңы полицияның жедел басқару орталықтарына қосылған. Бұл цифрлық жүйе қоғамдық қауіпсіздікті қамтамасыз етіп, құқық бұзушылықтардың алдын алуда негізгі құралға айналды.
Жаңа бейнемониторинг жүйесінің басты мақсаты – әрбір азаматтың өзін қауіпсіз сезінуін қамтамасыз ету. Қоғамда тәртіп орнатып, заңды сақтау арқылы тұрғындарға сенімді және жайлы орта қалыптастыру – бұл жобаның негізгі міндеті.
