Alibaba қолдау көрсететін PixVerse стартапы видеоны нақты уақыт режимінде жасайтын жаңа жасанды интеллект моделін таныстырды. Жаңа жүйе бейнеролик дайындалып жатқан сәттің өзінде оның мазмұнын басқаруға мүмкіндік береді. Қолданушы кейіпкердің әрекетін өзгертіп, жылау, би қимылын жасау немесе қозғалысын түрлендіру туралы пәрменді бірден бере алады.
Бұл технология видеоны бір мезетте құрастырып, басқаруға жол ашады. Жасанды интеллект қолданушының нұсқауын кідіріссіз орындай отырып, әрекеттерді бейненің өзіне бірден енгізеді. Осылайша PixVerse қазіргі видеогенераторлардың көпшілігінен ерекшеленеді, себебі әдетте мұндай жүйелерде нәтиже тек өңдеу толық аяқталған соң ғана ұсынылады.
Компанияның тең құрылтайшысы Джейден Се видеоны нақты уақытта жасау жаңа бизнес үлгілерін қалыптастыруы мүмкін екенін айтады. Оның пікірінше, көрермен сюжетке тікелей әсер ететін интерактивті драмалар мен алдын ала сценарийі жоқ бейнеойындар кең тарауы ықтимал. Бұл үрдіс контентті көру мен оған араласу арасындағы шекараны біртіндеп жояды.
PixVerse стартапы 2023 жылы құрылған. Өткен жылдың соңына қарай компания 60 миллион доллардан астам инвестиция тартқан. Қаржыландыруға Alibaba жетекшілік етіп, Antler венчурлық қоры да қатысқан. Компания өкілдерінің айтуынша, жаңа инвестициялық кезеңді жабу жақын арада аяқталуы мүмкін. Инвесторлардың басым бөлігі шетелдік.
Жаңа өнім Қытай компанияларының жасанды интеллект арқылы видео жасау саласындағы бәсекеде айтарлықтай күшейгенін көрсетті. Artificial Analysis дерегіне сәйкес, әлемдегі ең үздік он видеогенератордың сегізі қытайлық әзірлеушілерге тиесілі.
Бұл жүйелердің көбі жылдамдығы мен қолжетімді бағасы жағынан OpenAI ұсынған Sora 2 Pro моделінен басым. Дегенмен сарапшылар Sora әлі де бейне сапасы бойынша жоғары деңгейде екенін атап өтеді. Ал қытайлық компаниялар өндірісті кеңейту мен контентті жаппай жасауға басымдық беріп отыр. Мысалы, Shengshu стартапы TurboDiffusion жүйесі арқылы видеоны сапасын айтарлықтай төмендетпей, ондаған есе жылдам жасауға болатынын мәлімдеген.
