Британдық Ysmart London студиясы Kickstarter платформасында Toolt ықшам мультитулын таныстырды. Көлемі автокөлік кілтінің брелогындай ғана құрылғыда 36 түрлі құралдың қызметі жинақталған. Ол толыққанды құрал-сайман жәшігінің орнын баса алмайды, бірақ сапар кезінде, жорықта немесе ұсақ жөндеу жұмыстарында қажетке жарайды.
Toolt үш сырғымалы пластинадан тұрады. Бірінші пластинада сегіз алтықырлы кілт, биттерге арналған үш ұстағыш, ара, біз, сымның оқшаулағышын аршуға арналған құрал және бөтелке ашқыш орналасқан. Бұдан бөлек, спицаға арналған кілт, кәуап істігін тазалайтын құрал және супермаркеттегі арбаны бұғаттан шығаруға арналған кілт қарастырылған.
Екінші бөлігінде түрлі заттарды кесуге, ашуға және ажыратуға арналған құралдар жинақталған. Оның құрамында консерві ашқыш, шағын тұтқа, бау кескіш, жалпақ бұрауыш, велосипед шинасын шешуге арналған қалақша, қырғыш және Морзе әліпбиі берілген шағын жадынама бар.
Жоғарғы бөлігінен ауыстырмалы Stanley 11-921 жүзі шығарылады. Оны екі қалыптың біріне бекітуге болады. Қорғаныс ілмегі жүздің байқаусызда ашылып кетуіне жол бермейді. Үшінші пластинаға метрлік және дюймдік сызғыштар, айқыш ұшты бұрауыш, сондай-ақ ірі және ұсақ түйіршікті егеулер орналастырылған.
Жиналған күйінде Toolt-тың өлшемі 70 × 32 × 18 миллиметрді құрайды. Ал барлық пластинасы толық шығарылған кезде ұзындығы 180 миллиметрге жетеді. Құрылғыда бауға тағуға арналған тесік және қалтаға немесе рюкзакқа бекітуге арналған қыстырғыш бар.
Титаннан жасалған нұсқасының салмағы 90 грамм, ал алюминий нұсқасы 80 грамм тартады. Соңғысының сыртқы жабыны да күңгірттеу. Kickstarter науқанына алғашқылардың бірі болып қатысқандар үшін алюминий Toolt 130 доллар, ал титан нұсқасы 185 доллар тұрады. Кейін бөлшек саудадағы бағасы тиісінше 222 және 278 доллар болады. Науқан сәтті аяқталған жағдайда алғашқы жеткізілімді 2027 жылдың қаңтарында бастау жоспарланған.
Дереккөз: Kickstarter.
