Volkswagen компаниясы жаңа модельдерінде физикалық батырмаларды қайта енгізеді. Компанияның дизайн жөніндегі директоры Андреас Минтердің айтуынша, жүргізушілерге маңызды функцияларды басқару оңайырақ болуы керек.
Соңғы жылдары Volkswagen сенсорлық басқаруға толық көшіп, физикалық батырмалардан бас тартқан еді. Алайда, бұл шешім жүргізушілер тарапынан сынға ұшырады. Көбі сенсорлық экрандар мен сырғытпа арқылы климат-бақылау, дыбыс деңгейін реттеу сияқты функцияларды басқару ыңғайсыз екенін алға тартты.
Минтердің айтуынша, 2025 жылы шығатын ID 2all моделінен бастап Volkswagen бес негізгі функцияны басқаруға арналған физикалық батырмаларды қайтарады. Бұл батырмалар дыбыс деңгейін реттеу, орындықтарды жылыту, климат-бақылау және дабыл шамын қосу үшін қолданылады.
«Біз бұл қателікті қайталамаймыз», – деді Минтер. – «Рөлдегі батырмалар да физикалық қалыпқа оралады. Өйткені жүргізуші көлікті басқара отырып, функцияларды интуитивті түрде қолдана білуі керек. Бұл смартфон емес, автокөлік екенін естен шығармау керек».
Компания сенсорлық экрандарды толықтай алып тастамайды, өйткені кейбір функциялар, мысалы, АҚШ-тағы артқы камера міндеттілігі сияқты талаптарға байланысты экран арқылы басқарылуы керек. Дегенмен, Volkswagen болашақта ең қажетті функцияларды физикалық батырмалармен қамтамасыз ететініне сенімді.
