Халықаралық Visa төлем жүйесі жасанды интеллект қызметтеріне қаржылық құралдарды енгізу мақсатында OpenAI зерттеу зертханасымен стратегиялық серіктестік орнатқанын жариялады. Компаниялар жаңа буындағы жасанды интеллектіге негізделген коммерция үшін қауіпсіз инфрақұрылым қалыптастыруды көздейді. Бұл бастама Visa-ның жаһандық төлем желісі мен озық нейрожелілік технологияларды ұштастыруға негізделген. Бұл туралы компанияның ресми баспасөз хабарламасында мәлімделді.
Ынтымақтастықтың басталғаны туралы ресми хабарлама АҚШ-тың Сан-Франциско қаласында өткен Visa Payments Forum салалық іс-шарасында жария етілді. Жаңа бастама төлем жүйесінің заманауи технологиялық платформаларда қауіпсіз цифрлық есеп айырысу тетіктерін кеңейтуге бағытталған жаһандық стратегиясының маңызды бөлігіне айналады. Келісім аясында қаржы корпорациясы серіктестеріне өзінің қорғалған төлем желісіне, төлем деректемелерін растау құралдарына және деректерді токендеу тетіктеріне толық қолжетімділік береді.
Сонымен қатар тараптар корпоративтік секторда интеллектуалды агенттерді қолдану мүмкіндіктерін жан-жақты зерделеуді жоспарлап отыр. Бұл кәсіпорындардың ішкі жұмыс үдерістерін автоматтандыруды, бағдарламалық жасақтама әзірлеушілеріне арналған шешімдерді енгізуді және пайдалануға ыңғайлы диалогтік интерфейстерді әзірлеуді қамтиды.
Технологиялық ықпалдастық сатушылар мен тәуелсіз әзірлеушілерге жасанды интеллект пайдаланушының тапсырмасы негізінде бастамашылық ететін төлемдерді қабылдаудың жеңілдетілген тетіктерін пайдалануға мүмкіндік береді. Алаяқтық тәуекелдерін азайту және күмәнді операциялардың алдын алу үшін нақты уақыт режимінде жұмыс істейтін ішкі бақылау алгоритмдері қолданылады. Жасанды интеллект агенттері жүзеге асыратын барлық қаржылық операциялар пайдаланушы белгілеген рұқсаттар аясында ғана орындалады. Клиенттер шығыс лимиттерін өздері белгілей алады, төлем жасауға рұқсат етілетін сауда санаттарын таңдайды, сондай-ақ кез келген қаржылық операцияны міндетті түрде қолмен растау талабын қоса алады.
«Жасанды интеллект коммерция саласын кезінде интернет пен мобильді технологиялар өзгерткеннен де ауқымды деңгейде жаңғыртады. Жасанды интеллект агенттері экономиканың белсенді қатысушыларына айналып келеді. Сондықтан компания үшін төлемдердің сенімділігін, қауіпсіздігін және үздіксіз орындалуын қамтамасыз ету – басты басымдық. Біз дәл осындай инфрақұрылымды OpenAI секілді серіктестерімізбен бірлесіп қалыптастырып жатырмыз», – деді Visa компаниясының өнімдер және стратегия жөніндегі директоры Джек Форестелл.
Өз кезегінде технологиялық компания өкілдері цифрлық көмекшілер үшін түсінікті әрі ашық қаржылық орта қалыптастырудың маңызын атап өтті. Сонымен қатар мұндай орта барлық жағдайда адамның толық бақылауында болады. Әзірлеушілердің пікірінше, бұл пайдаланушылардың күнделікті қаржылық міндеттердің бір бөлігін нейрожелілерге сеніммен тапсыруына мүмкіндік береді.
«Алдағы уақытта коммерция әртүрлі платформалар мен қолданылу аяларын кеңінен қамти түседі. Жасанды интеллект агенттері адамдарға сатып алу мен төлем жасаудан бастап, күрделі қаржылық операцияларға дейінгі міндеттерді орындауға белсенді түрде көмектесетін болады. Серіктестерімізбен бірлесіп, пайдаланушының бақылауында болатын қауіпсіз әрі ашық агенттік төлемдер инфрақұрылымын қалыптастырып жатырмыз. Бұл адамдарға жасанды интеллект агенттерінің мүмкіндіктерін кеңінен пайдалануға жол ашады әрі барлық төлемнің сенімді әрі қауіпсіз өңделетініне сенімді болуына мүмкіндік береді», – деді OpenAI компаниясының серіктестік және коммерция бағытының жетекшісі Марко Марус.
Visa жаһандық төлем желісі әлемнің 200-ден астам елінде жеке тұлғалар, коммерциялық ұйымдар және мемлекеттік мекемелер арасындағы электрондық төлемдерді өңдейді. Компанияның Орталық Азия өңіріндегі қоғаммен байланыс жөніндегі ресми серіктесі – PBN Central Asia агенттігі.
Дереккөз: Visa баспасөз хабарламасы.
Қосымша материалдар мен сараптамалық шолуларды біздің Telegram арнамыздан оқуға болады.
