Boston Dynamics компаниясы өндіріс нысандарын бақылауға арналған Orbit платформасының жаңартылған нұсқасын таныстырды. Жүйе зауыт немесе өндіріс орнынан нақты уақыттағы мәлімет жинап, оның цифрлық көшірмесін жасайды. Spot атты төрт аяқты роботпен біріктірілген Orbit автоматты түрде инспекция жүргізіп, жылу шығу, ағып кету, зақымдану сияқты ақауларды анықтайды. Сонымен қатар, визуалды және температуралық деректерді талдайды.
Бұл жүйе апат болғанын күтпей-ақ, проблемаларға жедел әрекет етуге мүмкіндік береді. Orbit қашықтан бақылау, техникалық қызмет көрсетуді жеңілдету және өндірістегі қауіпсіздікті арттыру сияқты бірнеше бағытта тиімділік береді.
Платформа Spot роботының мүмкіндіктерін кеңейту үшін жасалған. Оның көмегімен өндірістегі визуалды бақылау жүйесі, роботтар паркін басқару және мәліметтерді интеграциялау секілді функцияларды оңай атқаруға болады. Жүйені кез келген нысанға оңай орнатып, кеңейтуге болады.
Көптеген өндіріс орындарында жабдықтардың жағдайы тек ағымдағы көрсеткіштермен бағаланады. Ал коррозия, қоқыс жиналуы немесе дабыл шамдарының жануы сияқты маңызды белгілер көп жағдайда көзден таса қалып, тек қолмен немесе естелікке сүйеніп тіркеледі. Бұл – апат кезінде нақты деректердің жетіспеуіне себеп болады.
Мұндай олқылықтың алдын алу үшін Spot қайталауға болатын әрі дәл суреттерді автоматты түрде түсіреді. Ал Orbit жүйесі ол суреттерді визуалды-мәтіндік сұраулар арқылы талдап, қауіпсіздікке төнген қауіптерді немесе күмәнді зақымдарды бірден анықтайды. Жүйе түсірілген материалдарды нақты жауаптарға, пайыздарға немесе мәтін түріндегі сипаттамаға айналдырады.
Жаңа енгізілген «Site View» функциясы арқылы Spot түсірген 360 градустық суреттер негізінде нысанның визуалды тарихы жасалады. Бұл – қашықтан бақылауға, уақыт өте келе өзгерістерді салыстыруға және бұрынғы материалдар негізінде жаңа инспекция жүргізуге жол ашады.
Сонымен қатар, Orbit температуралық ауытқуларды бақылап, бет әлпетті тануды автоматты түрде бұлыңғырлап, құпиялықты да қамтамасыз етеді.
Корпоративтік пайдаланушылар үшін бірнеше нысанда жұмыс істейтін роботтар паркін бір орталықтан басқару панелі бар. Онда әр роботтың әрекеті, жабдықтардың жағдайы мен өнімділігі көрініп тұрады. Ақпаратқа қолжетімділік пен тапсырмаларға рұқсат икемді түрде реттеледі.
Жүйенің жаңартулары сымсыз түрде жіберіледі. Операторлар роботтар мен олардың қосымша құрылғыларына арналған жаңартуларды бір пакетке біріктіріп, бірнеше құрылғыға бір мезетте орната алады. Orbit жүйесін компания серверіне де, бұлтты платформаға да орналастыруға болады. Сондай-ақ, оны API арқылы басқа жүйелермен біріктіруге мүмкіндік бар.
