Өскеменде экологиялық мониторинг жүйесін жетілдіру жұмыстары жүргізілуде. Қала ауасының жай-күйі туралы жедел ақпарат алу үшін газ талдағыштары бар дрондарды пайдалану жоспарланып отыр, деп хабарлайды YK-news.kz тілшісі.
Алғашында, бұл ой қызықты әрі тиімді көрінеді. Желсіз күндері газ талдағыштары бар дрондар ауаға көтеріліп, жинаған мәліметтерін Шығыс Қазақстан облысының цифрландыру басқармасының орталығына жібереді. Одан әрі экология мамандары бұл ақпаратпен жұмыс істеп, қажетті шараларды қабылдайды. Бұл әдіс мамандарды әр ауданға барып өлшеулер жасау міндетінен босатып, уақытты тиімді пайдалануға жол ашады.
-Дрондарды пайдалану ұсынысы Өскемен қаласының кәсіпкерлерінен түсті, — дейді «OSKEMEN TYNYSY» экологиялық қорғау бюросының жобалық кеңсесінің жетекшісі Елена Березинская-Абилова. — Бұл салада тәжірибелі компаниялармен кездесу өткізіп, газ талдағыштарын орнату мәселесін талқыладық. Бұл техникалық тұрғыдан мүмкін, қазір қажетті құрылғылардың сипаттамалары пысықталуда. Ал келесі қадам — қолданылатын газ талдағыштарының түрін анықтау.
Келесі кезеңде бұл құралдардың сертификатталуы және оларды тиісті мемлекеттік органдарға бекіту мәселесі шешілуі тиіс. Бұл үшін нормативтік-құқықтық базаға өзгерістер енгізу қажет болуы мүмкін. Қазір дрондар облысымызда өрт сөндірушілер мен полиция қызметінің қажеттіліктері үшін пайдаланылуда. Атмосфералық ауаны талдау үшін қандай көрсеткіштерді бақылау керектігін және бұл көрсеткіштерді өлшеу үшін қандай техникалық сипаттамалар қажет екенін анықтау маңызды. Дрондар әуеге көтерілуі алдында мониторинг жүйесінің жұмысын толық пысықтау керек: қандай деректер жиналады, қайда жіберіледі және оларды кім өңдейді. Осы мәселелерді шешуге Шығыс Қазақстан техникалық университеті көмектесуде.
Экологиялық қорғау бюросының бағалауы бойынша, қалаға газ талдағыштарымен жабдықталған кемінде 11 дрон қажет болады.
Ирина Плотникова
