Айдың оңтүстік полюсіндегі зерттеулер болашақта ғарыштық экспедицияларға жол ашуы мүмкін.
Пәкістан ғарыштық зерттеулер саласында тарихи қадам жасағалы отыр. Елдің Ғарыш және жоғарғы атмосфераны зерттеу жөніндегі ұлттық комиссиясы (SUPARCO) Қытайдың Ұлттық ғарыш басқармасымен (CNSA) серіктестік туралы келісімге қол қойды. Бұл меморандум Пәкістанның ғарыш бағдарламасында жаңа кезеңнің басталуын білдіреді.
“SUPARCO мен Қытай ұлттық ғарыш басқармасы арасындағы келісім – Пәкістанның ғарыш кеңістігін зерттеу саласындағы маңызды жетістігі. Бұл қадам елдің Айға қатысты зерттеулерге үлес қосуына мүмкіндік береді”, – деп хабарлады SUPARCO өкілдері.
Қытай әзірлеген “Чанъэ-8” миссиясы Айдың беткі қабатын зерттеуге, жаңа технологияларды сынауға және ондағы табиғи ресурстарды игеру мүмкіндіктерін қарастыруға бағытталған. Бұл жобаға Пәкістанның қосылуы елдің ғарыштық бағдарламасына серпін беріп қана қоймай, Халықаралық Ай зерттеу станциясын (ILRS) дамытуға да үлес қоспақ.
Пәкістандық ғалымдар мен инженерлер құрастырған зерттеу құрылғысы Айдың оңтүстік полюсіне қондырылады. Бұл аймақ ерекше зерттеу нысаны болып саналады, себебі ондағы жағдайлар болашақ ғарыштық экспедициялар үшін маңызды ақпарат бере алады.
Geo TV мәліметінше, аппарат озық ғылыми құралдармен жабдықталған. Оның бірқатары қытайлық және еуропалық ғалымдармен бірлесіп жасалған.
Зерттеу құрылғысы келесідей негізгі міндеттерді атқарады:
-Ай топырағының құрамын талдау, оның ресурстарын игеру мүмкіндігін анықтау;
-Айдың беткі қабатын картаға түсіру, болашақ ғылыми жұмыстарға негіз дайындау;
-Ғарыштық сәулелену мен плазмалық әсерлерді зерттеу, адамның Айда өмір сүру мүмкіндігін бағалау;
-Ұзақ мерзімді ғарыштық миссияларға арналған технологияларды сынақтан өткізу.
Пәкістандық ғарыш құрылғысының сәтті іске қосылуы елдің халықаралық ғарыштық зерттеулерге белсенді араласа бастағанын көрсетеді. Бұл миссия болашақта адамзаттың Айды игеруіне тың мүмкіндіктер ашуы мүмкін.
