Қазақстан Республикасы Ақпараттық технологиялар және цифрлық даму министрлігінің Телекоммуникациялар комитеті өкілдері Алатауға жұмыс сапарымен барып, байланыс сапасын жақсарту және телекоммуникациялық инфрақұрылымды дамыту мәселелерін талқылады.
Делегация аудан әкімдігі мен байланыс операторларының өкілдерімен бірге Заречный және Жетіген шағын аудандарын, сондай-ақ Алматы – Қонаев тасжолын аралады. Негізгі назар қала маңындағы және шалғайдағы аймақтарда тұрақты сигнал мен байланыс қолжетімділігін қамтамасыз етуге аударылды.
Сапар барысында «Мобайл Телеком-Сервис» компаниясы Алатаудағы алғашқы бесінші буын желісінің базалық станциясын іске қосты. Жаңа құрылғы желінің өткізу қабілетін арттырып, пайдаланушыларға жылдам және сенімді интернет қызметін ұсынуға мүмкіндік береді.
Объектілерге барудан кейін аудан әкімдігінде жиналыс өтті. Онда 5G желісін кеңейту, тұрақты желілерді дамыту және өңірде байланыс сапасын жақсарту жоспары талқыланды. Әлеуметтік нысандарды қосу мәселесіне де ерекше мән берілді. Биылдың соңына дейін Алатау қаласындағы барлық мектептер жоғары жылдамдықтағы интернетпен қамтылады.
Жиын нәтижесінде 2025–2027 жылдарға арналған жол картасы бекітілді. Құжатта байланыс желілерін дамыту, жабдықты жаңарту және әлеуметтік мекемелерді қосу жоспарлары қамтылған. Бұл шаралар өңір тұрғындары үшін заманауи цифрлық ортаны қалыптастыруға және телекоммуникациялық қызметтердің сапасын арттыруға бағытталған.
