OpenAI бас директоры Сэм Альтман компанияның алдағы жоспарларымен бөлісті. Оның айтуынша, GPT-5 моделіне деген сұраныс күрт артқандықтан, ең алдымен төлемді жазылым пайдаланушыларына жаңа мүмкіндіктер ашу басты басымдық болмақ.
Қазірдің өзінде ChatGPT Plus жазылымында GPT-5 Thinking пайдалану лимиті 3000 сұранымға дейін ұлғайтылды. Сонымен қатар GPT-5 Pro үшін шектеулі қолжетімділік енгізу мәселесі қарастырылып жатыр.
Келесі кезеңде компания негізгі назарды API қызметіне аударуды жоспарлап отыр. Альтманның мәліметінше, OpenAI жуық арада API өткізу мүмкіндігін шамамен 30 пайызға арттырып, қазіргі тұтынушылардың сұранысын қанағаттандыруға ниетті.
Болашақта ChatGPT-тің тегін нұсқасын жетілдіру және одан кейін API мүмкіндіктерін кеңейту көзделіп отыр. Компания басшысының айтуынша, алдағы бес ай ішінде есептеу қуаты екі есеге ұлғайып, сервистердің қолжетімділігі айтарлықтай жақсарады деп күтілуде.
