Испаниялық ғалымдар адамның цифрлық әлеммен табиғи әрі тікелей әрекеттесуін жаңа деңгейге көтеретін бірегей құрылғы – FlexiVol технологиясын әзірледі. Наварра университетінің зерттеушілері жасаған бұл жаңалық смартфондағыдай саусақпен басқаруға мүмкіндік береді. Ең қызығы — арнайы басқару құрылғысы мен көзілдіріктердің қажеті жоқ: қолыңды соз да, цифрлық нысандарға тікелей әсер ет.
FlexiVol – бұл үш өлшемді кескіндерді ауада «бейнелейтін» көлемді дисплей. Құрылғының негізін дәстүрлі қатты экранның орнына қолданылатын иілгіш, серпімді ленталар құрайды. Бұл ленталар секундына 2880 рет дірілдеп, әрбір сәтте жобалаушы кескінді әртүрлі тереңдік деңгейлерінде көрсете алады. Бұл — желдеткіш қалақшаларының айналуынан тұтас пішін көрінетіндей принципке ұқсайды. Осындай қозғалыс пен проекция үйлесімі нәтижесінде ауада нақты көлемі бар нысан пайда болады.
Ленталар арасындағы бос кеңістік пайдаланушының қолын дисплей ішіне енгізіп, нысандарды саусақпен басқаруына мүмкіндік береді: созу, айналдыру, түрту немесе цифрлық кеңістікпен «жүру» – бәрі кәдімгі сенсорлық экрандағыдай интуитивті орындалады.
FlexiVol-дың басты артықшылығы — көлемді кескіннің тұрақтылығы. Голограммаларда көру бұрышы өзгерсе, кескін бұзылады не жоғалады. Ал бұл технологияда бейне нағыз зат секілді қалыпта қалады. Ленталардың пішіні өзгергенде де кескін бұзылмайды — арнайы алгоритмдер динамикалық түрде кескінді лентаның қозғалысына бейімдеп отырады.
Жүргізілген сынақтар FlexiVol қолданушылардың 3D тышқанмен салыстырғанда объектілерді таңдауда және жылжытуда 30%-ға жылдамырақ әрекет еткенін көрсетті. Бұл — әсіресе командалық жұмыс үшін үлкен жетістік: бірнеше адам бір уақытта қала макетін өзгертіп немесе цифрлық үй жануарымен шынайы тірі жанмен әрекеттескендей ойнай алады.
Ғалымдар FlexiVol технологиясын музейлерде, экспонаттарды «тірілту» үшін немесе дизайн саласында – мысалы, жер бедерін қолмен өзгерту үшін пайдалануға болады деп есептейді. Болашақта бұл құрылғылар ақылды көзілдіріктерді, автономды көліктерді толықтырып, цифрлық деректермен табиғи әрекеттесудің жаңа дәуірін бастайды.
