Apple компаниясында ұзақ жылдар бойы бас дизайнер болып қызмет еткен Джонни Айв пен OpenAI басшысы Сэм Альтман смартфонға балама болатын жаңа құрылғы әзірлеуде. Бұл аппарат бұрынғыдай экран мен батырмаларға тәуелді емес — басқару жүйесі толығымен жасанды интеллект пен дауыс арқылы жүзеге асады.
Жаңа гаджет адам мен техника арасындағы байланысты өзгеше бағытта дамытпақ. Экранға үңілмей-ақ, құрылғыны дауыспен басқару арқылы ақпаратқа қол жеткізу – жобаның басты өзегі. Яғни, бұл тек құрылғы емес, пайдаланушы мен технология арасындағы жаңа қарым-қатынас үлгісі.
Мұндай бастама бұған дейін де көтерілген. Мәселен, Humane компаниясы ұсынған AI Pin құрылғысы экрансыз жұмыс істегенімен, нарықта кең сұранысқа ие бола алмады. Алайда технология әлемінің айтулы есімдері – Айв пен Альтман бұл жолы көпшілік сенімін ақтай алатын өнім ұсынады деп күтілуде.
Айта кетейік, жобаны жүзеге асыруға Apple-ден танымал дизайнерлер Тан Тан мен Эванс Хэнки де атсалысып жатыр. Ал OpenAI жақында Джонни Айвпен бірлескен стартапты 500 миллион долларға сатып алғаны белгілі болды.
Құрылғының нақты қашан жарық көретіні әзірге белгісіз. Бірақ технологиялық қауымдастық бұл бастамадан үлкен үміт күтіп отыр — себебі ол біз білетін смартфон ұғымына балама іздеудің алғашқы сәтті қадамы болуы мүмкін.
