BMW компаниясы өзінің жаңа моторының фотосын жариялады. Бұл – Toyota компаниясымен бірлесіп әзірленген, үшінші буындағы сутегі қондырғысы. Жабдық 2028 жылы өндірісте енгізіледі деп жоспарланған, бірақ Мюнхен мен Штайрдегі BMW компетенция орталықтары алғашқы прототиптерді жинауды бастады.
BMW AG басқарма мүшесі Йоахим Пост жаңа жүйенің әзірлеуін өз бақылауына алғанын атап өтті. Ол 2028 жылы тарихтағы алғашқы сериялы сутегі қондырғылы қозғалтқыш іске қосылатынын, бұл компанияның өнімдер портфеліне нөлдік шығарындылармен жұмыс істейтін, жоғары өнімді қуат жүйесін қосуды қамтамасыз ететінін хабарлады.
Үшінші буындағы сутегі қондырғысын BMW Group пен Toyota Motor Corporation бірлесіп әзірлейді.
BMW жаңа мотордың бірнеше ерекшелігін атап өтті:
Ықшамдылық. Жаңа жүйедегі отын элементтерінің ауданы шамамен 25% қысқарды. Артық қуат мотордың көлемін кішірейтуге мүмкіндік берді.
Жоғары интеграция мүмкіндігі. Үшінші буын жүйесі болашақ көліктердің архитектурасына оңай енгізіледі. Бұл сутегі технологиясын бензин, дизель немесе электр қуатына балама ретінде көптеген модельдерге қолдануға мүмкіндік береді.
Жақсартылған тиімділік пен компоненттер. Екінші буын жүйесімен салыстырғанда жаңа мотордың қозғалыс қашықтығы артқан, қуаты күшейген, ал отын шығыны азайған.
Қазіргі уақытта өндіріс орындарында прототиптерді жинау мен сынау жұмыстары жүргізілуде. Арнайы назар сапаға, индустрияландыруға және ұзақ мерзімді перспективада масштабталуға аударылған. Прототиптер жеке түрінде де, нақты көліктер құрамында да сынақтан өтеді.
