Қазақстан Республикасы Еңбек және халықты әлеуметтік қорғау министрлігі кәсіби даярлау жүйесіне виртуалды шындық технологияларын кезең-кезеңімен енгізуді бастады. Бұл бастама жұмыссыз азаматтарға тек теориялық біліммен шектелмей, оны тәжірибелік дағдылармен ұштастыра отырып меңгеруге мүмкіндік береді. Ең бастысы, оқыту үдерісі шынайы еңбек жағдайына барынша жақындатылған цифрлық ортада жүзеге асады.
Білім беру үдерісі екі кезеңге бөлінген. Алғашқы кезеңде қатысушылар Skills Enbek цифрлық платформасы арқылы бес бағыттың бірі бойынша қашықтан онлайн курстардан өтеді. Оқыту мемлекеттік және орыс тілдерінде қолжетімді, бұл әртүрлі тілдік ортадағы азаматтардың қатысуына жағдай жасайды.
Теориялық кезең аяқталғаннан кейін оқыту бетпе-бет форматта жалғасады. Қатысушылар Карьера орталықтарында арнайы жабдықтардың көмегімен алған білімдерін бекітіп, кәсіби дағдыларын жетілдіреді. Виртуалды шындық көзілдіріктері арқылы олар өндірістік ортаға барынша ұқсас жағдайда жұмыс істеу тәжірибесін игереді. Бағдарлама соңында әрбір қатысушыға сертификат беріледі, ол автоматты түрде оның жеке кабинетінде тіркеледі.
Пилоттық жоба Қазақстанның бес қаласында іске қосылады. Олардың қатарында Қонаев, Өскемен, Түркістан, Шымкент және Астана бар. Елордада жобаны іске қосу ағымдағы жылдың сәуір айына жоспарланған, кейіннен бұл тәжірибе өңірлерге кезең-кезеңімен таратылады.
Заманауи цифрлық технологияларды қолдану кәсіби даярлық сапасын арттырып қана қоймай, азаматтардың еңбек нарығына бейімделуін жеделдетеді. Нәтижесінде олар нақты тәжірибелік дағдыларды игеріп, жаңа талаптарға сенімді түрде жауап бере алатын маман ретінде қалыптасады.
