Қазақстандық IT-компаниялардың халықаралық нарыққа шығуына қолдау көрсету мақсатымен іске қосылған Global Outsourcer акселерациялық бағдарламасының екінші легінің қорытындылары шықты.
Бағдарламаға қатысқан 15 компания үш айдың ішінде 24 елмен, соның ішінде АҚШ, Ұлыбритания, Германия, Канада, БАӘ, Австралия сияқты мемлекеттермен 98 экспорттық келісімшартқа қол қойды. Жалпы сомасы 355 034 АҚШ долларын құрайтын бұл келісімдер қазақстандық компаниялардың халықаралық нарықта өз орнын табуға мүмкіндік берді.
Бағдарлама қатысушыларға халықаралық нарықта сатылым жасау және тұтынушы тарту бойынша қажетті дағдыларды меңгеруге көмектесті. Әсіресе, Upwork сияқты танымал халықаралық платформаларда жұмыс істеу және басқа да әлемдік нарықтарда өздерін көрсету мүмкіндігі артты.
Курс барысында қатысушылар 8 лекция, 14 мастермайнд-сессия және 50-ден астам стратегиялық кеңестерге қатысты. Әрбір қатысушы жеке трекерлер мен сарапшылардан қолдау алып, өз бизнесін халықаралық деңгейде дамытуға қажетті білім алды.
