Қазақстанда азаматтардың жеке деректерін қорғау үшін жаңа талаптар енгізілмек. Енді ақпараттық базалардан жеке деректерді жаппай шығару шектеледі, ал мәліметтерді сақтау мен қолдану қатаң бақылауға алынады. Бұл туралы жасанды интеллект және цифрлық даму министрі Жаслан Мадиев депутаттық сауалға берген жауабында хабарлады.
Министрлік мәліметінше, заң талаптарын бұзғандарға 30-дан 2000-ға дейін есептік көрсеткіш көлемінде айыппұл салынады. Бұл шамамен 130 мыңнан 8,6 миллион теңгеге дейінгі соманы құрайды.
Сонымен қатар министрлік жеке және заңды тұлғалардың деректерді қорғауға қатысты шағымдарын қарауға, әкімшілік құқық бұзушылық істерін жүргізуге және жоспардан тыс тексерулер өткізуге құзырлы.
Жаңа ережелер биометриялық деректер мен бет-әлпетті тану жүйелеріне де қатысты. Енді барлық сәйкестендіру тек Ұлттық биометриялық сәйкестендіру жүйесі арқылы жүргізіледі. Мұнда деректердің қалай жиналатыны, сақталатыны және өшірілетіні нақты реттеледі.
Заңға сәйкес, жеке деректер Қазақстандағы желілерде сақталуы тиіс. Елден тыс жерге жіберу тек деректер иесінің келісімімен және Қазақстанда сол деректердің қайталанатын базасы болған жағдайда ғана рұқсат етіледі.
Министрдің сөзінше, бұл шаралар азаматтардың жеке ақпаратын үшінші тұлғаларға немесе шетелге таралуынан қорғауға мүмкіндік береді.
Елизавета Аксенова
