Қазақстан жолдарын жүргізушісіз жүк көліктеріне бейімдеуге кірісті. Көлік министрі Нұрлан Сауранбаев үкімет отырысында жаңа жолдар алдағы 40–50 жылға есептеліп, автопилотпен жүретін, электр батареясы бар көліктерді қабылдайтындай етіп жобаланатынын айтты.
Министр әлемдік логистиканың тез өзгеріп жатқанын атап өтті. Қалаларда жүргізушісіз такси қызметтері іске қосылған, ал жүк тасымалы да біртіндеп автономды автономды жүк колонналарына ауысады. Сол себепті Қазақстан жол жүйесін ақылды сенсорлармен және бақылау құралдарымен алдын ала жабдықтауды жоспарлап отыр. Бұл жүргізушісіз көліктердің ел ішінде қауіпсіз және еркін жүруіне мүмкіндік береді.
Қазір министрлік көрші мемлекеттермен ЕАЭО аясында ірі пилоттық жобаны іске қосу жөнінде келіссөздер жүргізіп жатыр. Жоба 2027 жылы басталуы мүмкін және шекарадан өту уақытын қысқартады. Жүргізушісі жоқ жүк көліктеріне паспорттық тексеру қажет болмайды, транзит жылдамдайды, тасымал шығыны азаяды. Автопилот тәулік бойы жұмыс істей алады, жеткізу уақыты үш есе қысқарады және қоршаған ортаға түсетін жүктеме азаяды.
Көлік министрі Президент тапсырмасымен e-Joldar жобасы аясында жолдардың сандық паспорттары жасалып жатқанын еске салды. Бұл құжаттар жүргізушісіз жүк көліктерін елде толық енгізудің негізін құрайды.
Сонымен қатар министр 2027 жылдан бастап жолаушыларға арналған жүргізушісіз такси қызметін енгізу мүмкін екенін айтты. «Бұл нақты жүзеге асырылатын жоба, себебі әлемде мұндай көліктер қолданылады. Біз Қытайдың Шэньчжэн қаласында автопилотпен жүретін көліктерді көрдік. Бізде де енгізу біртіндеп, жолаушылардың қауіпсіздігі басты назарда болады», – деді министр.
Көлік министрінің сөзінше, жүргізушісіз жүк көліктері тасымал жылдамдығын шамамен үш есе арттырады. Себебі адам тәулігіне сегіз сағаттан артық жүргізе алмайды, ал автопилот 24 сағат бойы тоқтаусыз жұмыс істей алады. Жүргізушіге кететін шығындар жойылып, тасымал құны төмендейді.
