Елордадағы №8 мектеп-лицейінің командасы АҚШ-та ұйымдастырылған халықаралық FIDA USA Drone Soccer Championship чемпионатында Қазақстан намысын қорғады. Команда мүшесі Амантай Арсен жекелей сын бойынша бірінші орын иеленіп, «Супер пилот» атағына лайық деп танылды. Ал команда жалпы есепте екінші орынды еншіледі деп жазады Digital Business Kazakhstan.
Жекелей сындағы үздік нәтиже
Жеке жарыстар барысында Амантай Арсен турнирге қатысқан барлық үміткердің арасынан ең жоғары нәтиже көрсетті. Астана қаласы әкімдігінің мәліметінше, ол сайыс кезінде жоғары техникалық шеберлігін, шешім қабылдаудағы жеделдігін және дронды сенімді басқару қабілетін айқын танытқан. Жарыс қорытындысы бойынша оған «Супер пилот» атағы берілді.
Жекелей жетістіктен бөлек, №8 мектеп-лицейінің командасы чемпионаттың жалпы командалық есебінде екінші орынға тұрақтады. Қала әкімдігі бұл нәтижені оқушылардың үйлесімді еңбегі мен жаттықтырушылар дайындығының жоғары деңгейін көрсететін маңызды жетістік ретінде бағалады.
Әлия Рахимова
Қосымша материалдар мен сараптамалық мақалаларды MobiLaser Telegram арнасынан оқуға болады.
