Noetix компаниясы адаммен табиғи визуалды байланыс орната алатын жоғары технологиялық бионикалық роботты көпшілік назарына ұсынды. Компания бұл құрылғыны адаммен көз арқылы қарым-қатынас жасау қабілетіне ие әлемдегі алғашқы робот ретінде сипаттап отыр.
Жаңа модель адам келбетіне барынша ұқсас етіп әзірленген. Роботтың қозғалыс жүйесі 24 еркіндік дәрежесінен тұрады. Оның ішінде көз қозғалысына жауап беретін 6 еркіндік дәрежесі, қас қимылына арналған 4 еркіндік дәрежесі, ауыз бен ерін қозғалысын қамтамасыз ететін 11 еркіндік дәрежесі және мойын қозғалысына арналған 3 еркіндік дәрежесі бар. Мұндай құрылым роботтың бет әлпетін анағұрлым табиғи қалыпта бейнелеуге мүмкіндік береді.
Робот тек дыбысты қайталаумен шектелмейді. Ол ерін қимылын дәл сәйкестендіріп, адаммен көз байланысын орнатып, эмоциялық күйді шынайы түрде көрсете алады. Сонымен қатар, арнайы дағдылар жүйесі арқылы көпарналы өзара әрекет тетігін жүзеге асырады. Бұл технология адамның сөзі мен әрекетін тек сыртқы форма ретінде қабылдамай, оның астарындағы мағынаны саралауға мүмкіндік береді. Басқаша айтқанда, робот семантикалық талдау жүргізу арқылы айтылған ойдың мазмұнын түсініп, соған сәйкес эмоциялық жауап бере алады.
Мамандардың пікірінше, мұндай технология адам мен жасанды интеллект арасындағы байланысты жаңа деңгейге көтереді. Әсіресе, эмоцияны табиғи жеткізу мен визуалды байланыс орнату қабілеті роботтың адаммен қарым-қатынасын шынайы коммуникацияға жақындата түседі.
Ресми мәліметке сәйкес, бионикалық роботты тұрмыстық ортада, қабылдау бөлімдерінде, сервистік қызмет көрсету саласында және көрме кеңістіктерінде экспонаттарды таныстыру мақсатында қолдануға болады.
Jin
Дереккөз: mydrivers
