Ақтөбе қаласында жасанды интеллект саласына оқыту үшін жаңа мектеп ашу жоспарланып отыр. Сонымен қатар мектеп оқушылары мен түлектерге арналған инновациялық орталық құрылмақ, онда жасанды интеллект технологияларын тегін үйренуге мүмкіндік беріледі.
Облыс әкімдігінде өткен цифрлық трансформация мәселелеріне арналған кеңесте IT-сала мамандарын даярлау қажеттігі басты тақырып болды. Сарапшылардың баяндамасына сәйкес, облыста IT Park ашу жоспары бекітілді. Оның аумағы 1700 шаршы метрді құрап, жыл сайын 300-400 студентті оқытуға мүмкіндік береді.
IT Park негізінде Tomorrow School атты жасанды интеллект мектебі жұмыс істей бастайды. Мектеп peer-to-peer тәсілі бойынша ұйымдастырылып, білім мен тәжірибе қатысушылар арасында тікелей алмасады. Яғни, оқушылар өзара тәжірибе бөлісіп, орталық элементсіз іс-қимыл жасайды.
Сондай-ақ IT Park аумағында 12-18 жас аралығындағы жасөспірімдерге арналған TUMO Center инновациялық орталығы ашылады. Орталықта жасанды интеллект саласында тегін білім беру қарастырылған, ал әр оқушы өзіне ыңғайлы бағытты таңдай алады.
Жоба аймақтың IT инфрақұрылымын дамытуға және жас таланттарды кәсіби дайындыққа тартуға бағытталған. Мамандардың айтуынша, осындай бастамалар болашақта Ақтөбе өңірін цифрлық технологиялар мен жасанды интеллект саласында алдыңғы қатарға шығарады.
