Ақтөбеде ерекше білім қажеттілігі бар балаларға арналған «Сауатты бала» мен «Дыбыстар әлемі» атты мобильді қосымшалары әзірленді. Бұл туралы Mobilaser порталы Rikatv.kz деректеріне сүйе отырып хабарлайды.
Жоба Қазақстан Республикасының Білім және ғылым министрлігінің қолдауымен 2023–2025 жылдарға арналған грант аясында Ақтөбе өңірлік Қ. Жұбанов атындағы университеттің ғалымдары тарапынан жүзеге асырылды.
Соңғы жылдары Ақтөбеде ерекше білім қажет ететін балалар саны артты. 2023 жылы олардың саны 8 091 болса, 2025 жылы 9 774-ке жетті. Бұл педагогтар үшін жүктемені арттырып, қазақ тіліндегі қолжетімді цифрлық ресурстарға деген сұранысты күшейтті.
Осы қажеттілікті ескере отырып, жаңа мобильді қосымшалар жасалды. Жобаны педагогика ғылымдарының кандидаты, доцент М. Н. Есенгулова басқарды. Негізгі мақсат – үйде оқитын, денсаулығында шектеу бар немесе әлеуметтік белсенділігі төмен балалар үшін қолайлы білім беру ортасын құру. Қосымшалар балалардың сөйлеу, ойлау және қарым-қатынас дағдыларын дамытуға бағытталған.
«Сауатты бала» және «Дыбыстар әлемі» толық логопедиялық жаттығулар, ойын тапсырмалары, визуалды және аудиоматериалдармен жабдықталған. Эксперимент көрсеткендей, бұл құралдар педагогтардың жұмысын жеңілдетіп қана қоймай, балалардың сөйлеу қабілеттерін дамытуда да тиімді. Апробацияға «Ақбота» арнайы балабақшасы мен Сөйлеу орталығының тәрбиеленушілері қатысты. Нәтижесінде олардың сөздік қоры, артикуляциялық дағдылары, нұсқауларды түсіну қабілеті және байланысқан сөйлеуі айтарлықтай жақсарды.
Қазақ тіліндегі сапалы контент ата-аналар үшін де үлкен көмек болды. Енді олар түзету және дамытушы жұмыстарды үйде жүйелі түрде жүргізе алады. Педагогтардың пікірінше, қосымшалар инклюзивті білім беру процесін цифрландыруға жаңа серпін берді.
Жоба нәтижесінде ерекше білім қажет ететін балалар үшін сұранысқа ие отандық цифрлық өнім пайда болып, білімге қолжетімділікті арттырды. Бұл қосымшалар тек Ақтөбеде ғана емес, бүкіл елде инклюзивті білім жүйесін дамытуда маңызды құралға айналды.
