Франция, Германия, Италия және тағы 14 мемлекет автономды автомобильдерді трансшекаралық сынақтан өткізу жұмыстарын үйлестіруге бағытталған бірлескен декларацияға қол қойды. Бұл қадам Еуропада аталған технологияны енгізу үдерісін жеделдетуге мүмкіндік бермек.
Жоспарланған мерзімнен шамамен жеті жылға кешігіп қалған автономды көлік құралдарын сынау алдағы айларда Еуропа аумағында айтарлықтай кеңеюі тиіс.
Бұл бастаманың негізгі мақсаты — сынақ жүргізу үдерісін жеңілдету және оған қатысушы елдер үшін бірыңғай ережелер жүйесін қалыптастыру.
Осылайша, бұрын әр елде бөлек-бөлек жүргізілген пилоттық жобалардан бас тартып, автономды көліктерді болашақта кең ауқымда енгізуге дайындықты көздейтін үйлестірілген жалпыеуропалық тәсіл қалыптасады.
Декларацияға Франция, Германия, Италия, Австрия, Бельгия, Хорватия, Кипр, Чехия, Эстония, Финляндия, Грекия, Венгрия, Ирландия, Люксембург, Нидерланд, Польша және Швеция қол қойды.
Бастама қоғамдық көлік, жүк тасымалы және логистика салаларын қамтиды. Қатысушы елдер бірыңғай мақұлдау қағидаттарын әзірлеп, рұқсат беру рәсімдерін үйлестіреді. Сонымен қатар Еуропа бойынша ауқымды сынақтар қатар жүргізілмек.Аталған мәлімдеме құрлықта автономды көлік саласындағы белсенділіктің күшеюі аясында жасалып отыр.
Сол күні Uber мен британдық Wayve стартапы Лондонда автономды такси қызметін пайдалану үшін ашық күту тізімін іске қосты. Жоба алдағы айларда іске қосылады деп күтілуде, ал көлік салонында қауіпсіздік операторлары болады. Бұл — Ұлыбритания тұрғындары үшін роботакси қызметіне жазылу мүмкіндігі алғаш рет ұсынылатын жағдай болмақ.
Еуропада роботаксилер қай жерде іске қосылуға жақын?
Автономды таксилер АҚШ пен Қытайда өнеркәсіптік ауқымда қазірдің өзінде жұмыс істеп тұр. Енді Еуропа бұл технология бойынша артта қалуды қысқартуға ұмтылып отыр: ірі компаниялар құрлық бойынша сынақ жобаларын кеңейтуде.
Uber деректеріне сәйкес, Загреб Еуропадағы коммерциялық роботакси қызметі үшін алғашқы нарықтардың бірі болып отыр. 8 сәуір күні компания Хорватия астанасында ең алғашқы пилоттық жобалардың бірін іске қосты. Жоба аясында Uber қытайлық Pony.ai компаниясымен және хорватиялық Verne стартапымен бірлесіп, қалада шамамен 10 автономды таксиден тұратын сынақ паркін іске қосқан.
Қытай мен АҚШ-та 2025 жылы жүргізушісіз такси парктері екі еседен астам өсіп, 20-дан астам қалада жұмыс істейтін шамамен 8 000 көлікке жетті. Бұл туралы Халықаралық энергетикалық агенттік (ХЭА) деректері хабарлайды. Ал 2035 жылға қарай әлемде роботаксилер саны 700 мыңнан 3 миллионға дейін жетуі мүмкін деген болжам бар.
BCG консалтингтік компаниясы да осы кезеңге қарай әлем бойынша шамамен 3 миллион роботакси болады деп күтеді. Оның ішінде 850 мыңы Қытайда, 350 мыңы АҚШ-та және 120 мыңы Еуропада шоғырлануы ықтимал.
Сарапшылар Еуропада технологияның баяу енгізілуін қауіпсіздік талаптарының қатаңдығымен және қоғамдық көлік мәдениетінің жоғары дамуымен байланыстырады. Алайда бұл бағыттағы қозғалыс қарқын алып келеді.
«Лондон дайын, Мадрид те солай.Коммерциялық қызметті біз 2027 жылдың өзінде-ақ көре алуымыз мүмкін», — дейді автономды мобильділік жөніндегі сарапшы Эрве де Треглоде.
Euronews
