Ресейде ядролық энергетикаға негізделген Ай базасын жобалау кезінде цифрлық егіз технологиясын пайдалану жоспарланып отыр. Бұл жобамен Келдыш атындағы зерттеу орталығының мамандары Курчатов институты және Лавочкин атындағы ғылыми-өндірістік бірлестікпен бірлесіп айналысады. Бұл туралы ТАСС агенттігіне М.В. Келдыш атындағы зерттеу орталығының бас директоры Владимир Кошлаков мәлімдеді.
Владимир Кошлаковтың айтуынша, ядролық энергия көздеріне негізделген Ай базасына қатысты жоба аясында Курчатов институты мен С.А. Лавочкин атындағы ғылыми-өндірістік бірлестікпен бірге арнайы цифрлық егіздер, сандық модельдер және инженерлік есептеулер әзірленбек. Оның сөзінше, мұндай жобаларда қателесуге жол жоқ. Сондықтан барлық жүйе Айға жеткізілмей тұрып-ақ толық тексеріліп, сенімді жұмыс істейтініне көз жеткізілуі тиіс. Ол мұндай ауқымды міндеттерді заманауи цифрлық технологияларсыз жүзеге асыру мүмкін еместігін атап өтті.
Цифрлық модельдер болашақ инфрақұрылымның барлық параметрін алдын ала есептеуге мүмкіндік береді. Атап айтқанда, энергия жүйелерінің жұмыс істеу ерекшеліктері, жабдықтардың Ай жағдайындағы төзімділігі мен техникалық мінез-құлқы жан-жақты сараланады. Жоба «Ғарыш» ұлттық бағдарламасы аясында жүзеге асырылып, Жерден тыс миссияларға арналған атомдық технологияларды дамыту бағытымен тікелей байланысты. Негізгі мақсат — ядролық қондырғы негізіндегі энергия көзімен қамтамасыз етілген толыққанды Ай базасын құру.
Жобаның алдын ала мерзімдері де белгілі болды. Мамандардың болжамынша, алғашқы элементтерді Айға алдағы 5–7 жыл ішінде жеткізу мүмкін. Ал жобаны толық көлемде іске асыру үшін 2033–2035 жылдар аралығында бірнеше ғарыштық ұшырылым қажет болады.
Қосымша материалдар мен сараптамалық мақалаларды MobiLaser Telegram арнасынан оқуға болады.
