Халықаралық электрбайланыс одағының (ITU) 2025 жылғы деректеріне сәйкес, белсенді қолданушыларға арналған жоғары тұтынымды мобильді байланыс жиынтығы (140 минут сөйлесу, 20 SMS және 5 ГБ интернет) құны Еуразиялық экономикалық одақ пен Орталық Азия елдері арасында айтарлықтай айырмашылыққа ие екенін көрсетеді.
Атап айтқанда, белсенді пайдаланушыларға арналған ең қолжетімді кеңейтілген мобильді тарифті Өзбекстан ұсынады: айына 2,32 АҚШ доллары. Одан кейін Қырғызстан (2,87 АҚШ доллары) орналасқан, ал алғашқы үштікті Беларусь (4,99 АҚШ доллары) түйіндейді.
Қазақстанда кеңейтілген мобильді тарифтің абоненттік төлемі 11,8 АҚШ долларын құрады. Бұл – ЕАЭО мен Орталық Азия елдерінің ішіндегі ең жоғары көрсеткіштердің бірі. Одан қымбат тариф тек Түрікменстанда байқалады, онда мобильді байланыс өңірдегі ең қымбат қызмет ретінде бағаланып, айына 51,4 АҚШ долларына жетеді.
Сонымен қатар ITU деректеріне сәйкес, Қазақстанда мобильді интернеттің орташа құны өсіп келеді. Мәселен, 10 ГБ көлеміндегі мобильді интернет пакеті 2022 жылы 7,44 АҚШ долларын, 2023 жылы 8,89 АҚШ долларын, ал 2024 жылы 11,14 АҚШ долларын құраған.
Қазақстандық статистика да осы теріс үрдісті растайды: ҚР АСПиР Ұлттық статистика бюросының мәліметі бойынша, биылғы сәуір айының қорытындысында мобильді байланыс тарифтерінің абоненттік төлемі бір жыл ішінде 10 пайызға артқан.
Сонымен бірге Қазақстан мобильді интернет сапасы бойынша ЕАЭО және Орталық Азия елдерінің ішінде көш бастап келеді. Алайда соған қарамастан, биыл интернет жылдамдығы қатарынан екінші ай төмендеп отыр. Speedtest Global Index деректеріне сәйкес, 2026 жылдың наурыз айында Қазақстандағы мобильді интернеттің медианалық жылдамдығы 93,68 Мбит/с болған. Бұл ақпан айындағы 98,78 Мбит/с және қаңтардағы 100,2 Мбит/с көрсеткіштерінен төмен.
Салыстыру үшін айтсақ, Өзбекстанда мобильді интернеттің медианалық жылдамдығы биыл қаңтардағы 51,42 Мбит/с деңгейінен наурызда 55,19 Мбит/с-қа дейін өскен, ал Қырғызстанда сәйкесінше 51,48 Мбит/с-тан 52,64 Мбит/с-қа дейін артқан.
Осылайша, Қазақстан өңірде мобильді интернет жылдамдығы бойынша көшбасшылық орнын сақтап отыр, алайда бұл көшбасшылық абоненттер үшін барған сайын қымбатқа түсуде.
Қосымша материалдар мен сараптамалық мақалаларды MobiLaser Telegram арнасынан оқуға болады.
