Қазақстанда нақты экономика аясында криптотөлемдерді заңды түрде қолдану кезеңі ресми түрде басталды. Мемлекет басшысының alem.ai халықаралық ІТ-хабына жасаған сапары барысында Премьер-Министрдің орынбасары, жасанды интеллект және цифрлық даму министрі Жаслан Мадиев цифрлық активтер арқылы елдегі алғашқы сатып алу операциясын жүзеге асырды.
Аталған тарихи транзакция Binance Kazakhstan экожүйесі мен Alatau City Bank арасындағы технологиялық ықпалдастықтың нәтижесі ретінде іске асты. Президенттің көз алдында өткен бұл процесс бірнеше секунд ішінде орындалды. Қарапайым банктік QR-код арқылы цифрлық активтер бірден теңгеге айырбасталып, кәсіпкерлік субъектісіне төлем жасалды. Бұл Қазақстанның қаржы жүйесі жаңа технологияларды қабылдауға дайын екенін көрсетті.
Жоба Қазақстан Республикасының Ұлттық Банкі енгізген реттеушілік тәжірибе алаңында сынақтан сәтті өтті. Осы тәжірибе негізінде бастама 2026 жылдың мамыр айынан бастап ел көлемінде кезең-кезеңімен кеңейтіле бастайды. Жаслан Мадиевтің айтуынша, елімізде қалыптасқан құқықтық база криптокомпаниялар мен банктердің ашық әрі тиімді өзара әрекеттесуіне мүмкіндік береді. Бұл – цифрлық активтерді көлеңкелі айналымнан шығарып, экономикалық жүйеге енгізудің стратегиялық қадамы. Сонымен қатар криптовалюталардың бағдарламаланатын құрал ретіндегі артықшылықтары – операциялардың жылдамдығы мен салыстырмалы түрде төмен құны – қаржы секторын жаңғыртуда маңызды рөл атқарады.
Қазақстан Республикасы Цифрлық активтер және серпінді технологиялар комитетінің төрағасы Гиззат Байтурсынов алдағы кеңейту кезеңі криптотөлемдерді шектеулі құрал деңгейінен күнделікті қолданыстағы қызмет түріне айналдыратынын атап өтті. Оның пікірінше, Қазақстан ТМД кеңістігінде алғашқылардың бірі болып дәстүрлі банктік қосымшалардың ыңғайлылығын блокчейн технологияларының мүмкіндіктерімен ұштастыратын бірегей модель қалыптастырып отыр.
Жалпы алғанда, Қазақстанның бұл қадамы жаһандық үрдістермен сабақтас. Бүгінде әлемде жарты миллиардтан астам адам цифрлық активтерді пайдаланады, ал стейблкоиндер арқылы жасалатын операциялар көлемі ірі халықаралық төлем жүйелерінің айналымымен деңгейлес келеді. Крипто және дәстүрлі қаржы арналарының біріктірілуі елдің Еуразия кеңістігіндегі маңызды технологиялық орталық ретіндегі орнын нығайтып, инновацияларды экономиканың ашықтығы мен азаматтардың игілігіне бағыттауға жол ашады.
Қосымша материалдар мен сараптамалық мақалаларды https://t.me/mobilaser арнасынан оқуға болады.
