Қазақстан Республикасының Өнеркәсіп және құрылыс министрлігі Ұлттық геологиялық қызметпен бірлесіп, геология саласына жасанды интеллект технологияларын енгізу жобасын тәжірибелік деңгейде іске асыру кезеңіне өтті. Бұл туралы ведомствоның вице-министрі Жаннат Дубирова мәлімдеді.
Жоба EPAM Kazakhstan компаниясының қатысуымен жүзеге асырылуда. Сонымен қатар технологиялық инфрақұрылымды қамтамасыз ету үшін отандық QazTech және AlemCloud платформалары тартылған.
Зерттеу жұмыстары барысында мәтінді тану технологиялары мен заманауи тілдік модельдер қолданылып, архивтік деректер сандық форматқа көшіріліп, машинамен өңдеуге бейімделуде. Бұл тәсіл ұзақ жылдар бойы жинақталған геологиялық ақпаратты жүйелеуге және оны тиімді пайдалануға жол ашады.
Жобаның негізгі мақсаты – жасанды интеллектіні геолог маманның кәсіби ойлау логикасына жақындатып, кен орындарының қалыптасуындағы көзге көрінбейтін заңдылықтарды анықтай алатын деңгейге жеткізу. Мұндай талдау геологиялық барлау жұмыстарының дәлдігін арттырып, жаңа ресурстарды табу мүмкіндігін кеңейтеді.
Бастама аясында мамандарды деректер ғылымы құралдарымен жұмыс істеуге үйрету де қатар жүргізілуде. Сонымен бірге геоақпараттық жүйелер негізінде сүзгілеу мүмкіндігі бар құрылымдалған деректер қоры қалыптастырылып, интерактивті карта мен интеллектуалды чат-бот әзірленіп жатыр. Бұл шешімдер саланың цифрлық трансформациясын жеделдетуге бағытталған.
