Шымкент қаласында өткен Central Asia Programming Championship 2026 спорттық бағдарламалау чемпионаты аймақтың ең мықты қатысушыларын бір алаңға тоғыстырды. Байқауға Қазақстан, Қырғызстан, Өзбекстан, Тәжікстан және Түрікменстан елдерінен жасы жиырмадан асқан дарынды мамандар қатысты. Қатысушылар үш миллион теңге көлеміндегі жүлде қоры үшін ғана емес, сонымен қатар халықаралық сарапшылар алдында өз қабілеттерін көрсету мүмкіндігі үшін де сынға түсті.
Халықаралық деңгейде ұйымдастырылған бұл дода қатысушыларға күрделі алгоритмдік және аналитикалық тапсырмаларды шешу арқылы өз кәсіби әлеуетін танытуға жол ашты. Жарыс әлемдік бағдарламалау олимпиадаларына тән ICPC үлгісінде өтті. Алдын ала іріктеу кезеңі онлайн форматта 28 ақпанда ұйымдастырылып, оның нәтижесінде үздік деп танылған қатысушылар финалдық кезеңде офлайн форматта бас қосты. Шешуші сәтте өңірдің таңдаулы әзірлеушілері бір кеңістікте кездесіп, өзара бәсекеге түсті.
Финал қорытындысы бойынша қатысушылар жоғары деңгейдегі дайындықтарын көрсетті. Нәтижесінде жарыстың жеңімпазы атанған тәжікстандық Фарход Хакимйон бірінші орынды иеленді. Екінші орын қазақстандық Айбар Қуанышбайға бұйырса, үшінші орын тағы бір қазақстандық қатысушы Альтаир Ашуровқа берілді.
Жалпы жүлде қоры үш миллион теңгені құрап, ол орындарға сәйкес бөлінді. Бірінші орын иегеріне бір жарым миллион теңге, екінші орынға бір миллион теңге, ал үшінші орынға бес жүз мың теңге табысталды.
Жеңімпаз Фарход Хакимйон бұл жарыстың өзінің кәсіби дамуына жаңа серпін бергенін атап өтті. Оның айтуынша, мұндай деңгейдегі додада өз қабілетін көрсету және көршілес елдердің үздік бағдарламашыларымен жүздесу ерекше тәжірибе болған. Бұл чемпионат оны әрі қарай дамуға және алгоритмдік білімін нақты жобаларда қолдануға ынталандырған.
Биылғы чемпионатта сараптамалық бағдарламаға да айрықша мән берілді. Финалдық кезеңге халықаралық технологиялық компаниялардың өкілдері қатысып, қатысушылардың шешімдерін бағалап қана қоймай, өз тәжірибелерімен бөлісті және кәсіби бағыт-бағдар берді. Олардың қатарында Meta компаниясының тәжірибелі әзірлеушісі Бақытжан Байжігітов, AGI Lab және Khan Group компанияларының жетекшісі Жомарт Садыков, Higgsfield AI компаниясының кадрлық саясат жөніндегі вице-президенті Далида Ерқұлиева, Google компаниясының аға әзірлеушісі Аман Өтемұратов, Booking платформасының әзірлеушісі Нарикби Мақсұт және TON Core жобасының өкілі Александр Кирсанов бар.
Alem.ai Foundation қорының директоры Адина Мағавина бұл чемпионаттың өңірдегі IT-мамандардың дайындық деңгейі жоғары екенін айқын көрсеткенін атап өтті. Оның пікірінше, аталған дода тәжірибе алмасуға мүмкіндік беретін маңызды алаңға айналып, үздік мамандар мен халықаралық сарапшылар арасында кәсіби байланыс орнатуға жол ашты.
