Илон Маск негізін қалаған SpaceX компаниясының Starlink жобасы аясында спутниктік байланысқа тікелей қосыла алатын мобильді құрылғы әзірлеуі мүмкін. Бұл туралы бірқатар халықаралық бұқаралық ақпарат құралдары хабарлады.
Reuters агенттігінің мәліметінше, Масктың компаниясы Starlink жобасына қатысты жаңа өнім түрлерін зерттеп жатыр. Солардың бірі — Starlink атауымен шығарылатын ықтимал смартфон. Қазірге дейін нақты техникалық сипаттамалар жарияланған жоқ, алайда сөз болып отырған құрылғы SpaceX-тің орбитадағы спутниктер жүйесіне тікелей қосыла алатын технологияға негізделмек.
Илон Маск өзі дәстүрлі форматтағы смартфон әзірлеу туралы болжамдарды бірнеше мәрте жоққа шығарды. Оның айтуынша, компания классикалық мағынадағы телефон жасап жатқан жоқ. Дегенмен, ол болашақта функционалдық тұрғыдан мүлде өзгеше, спутниктік байланысқа басымдық беретін инновациялық құрылғының пайда болу мүмкіндігін жоққа шығармайды.Масктың пікірінше, мұндай жоба жүзеге асса, ол қазіргі нарықтағы смартфондар концепциясынан түбегейлі ерекшеленетін болады.
SpaceX соңғы жылдары мобильді байланыс саласына жүйелі түрде еніп келеді. Компания АҚШ-тың T-Mobile операторымен серіктестік орнатып, қолданыстағы смартфондарға Starlink спутниктік жүйесі арқылы тікелей байланыс орнатуға мүмкіндік беретін технологиялық шешімдерді сынақтан өткізуде. Сонымен қатар, 2025 жылы EchoStar компаниясынан спутниктік жиілік спектрін сатып алу жөніндегі 19,6 миллиард долларлық келісім SpaceX-тің бұл бағыттағы стратегиялық басымдығын айқындай түсті.
Қазіргі таңда компания орбитада 9 500-ден астам спутникті орналастырып, адамзат тарихындағы ең ірі ғарыштық байланыс желісін қалыптастырды. Starlink қызметін әлем бойынша 9 миллионнан аса абонент пайдаланады. Оның ішінде 650-ге жуық спутник құрылғыларды тікелей байланыстыру бағдарламасына тартылған. Бұл жоба ғаламдық деңгейде үздіксіз ұялы байланыс орнату мүмкіндігін қамтамасыз етуді көздейді.
Сонымен қатар, ғарыш кеңістігінің қауіпсіздігі мәселесі де SpaceX назарынан тыс қалған емес. Компания 2026 жылға дейін шамамен 4 400 спутнигінің орбитасын 550 шақырымнан 480 шақырымға дейін төмендету туралы шешім қабылдады. Инженерлік мәселелер жөніндегі вице-президент Майкл Николлстың түсіндіруінше, бұл шара орбитадағы қозғалысты басқаруды жеңілдетіп, өзге операторлардың спутниктерімен ықтимал соқтығысу қаупін азайтуға бағытталған.
Аталған қадам 2025 жылдың соңында тіркелген техникалық инциденттен кейін қабылданды. Сол кезде SpaceX спутниктерінің бірі аз көлемде ғарыш қоқысын түзіп, 418 шақырым биіктікте орналасқан басқа бір ғарыш аппаратымен байланысқа кедергі келтіргені хабарланған болатын.
