2026 жылдың 1 қаңтарынан бастап Қазақстанда сауда саласы жаңа цифрлық кезеңге өтеді. Елде Ұлттық тауарлар каталогын (ҰТК) қолдану міндеттеледі. Бұл жүйелік жоба мемлекет, бизнес және тұтынушылар үшін біртұтас цифрлық кеңістікті қалыптастыруға бағытталған.
ҰТК тек деректер базасы немесе тізім емес. Ол экономиканың бірыңғай тілі іспеттес, әр тауар стандартталған сипаттамаға ие, құрылымы айқын және қозғалысы барлық кезеңде бақыланады.
Мемлекет үшін бұл жүйе тауар айналымын айқын көрсетіп, нарықты дәл бағалауға және заңсыз немесе сапасы төмен өнімдерді анықтауға мүмкіндік береді. Тұтынушыларға өнімнің құрамы, шығу тегі мен сертификатталуы туралы сенімді ақпаратқа қол жеткізу жеңілдейді. Бизнес үшін бұл тауарларды жүйелі түрде басқаруға, жұмыс үрдісін алдын ала жоспарлауға және тиімді ұйымдастыруға жол ашады.
Цифрлық жүйені енгізудің артында маңызды басқарушылық мәселелер де жатыр. Қолданыстағы есеп жүйелерін жаңа талаптарға бейімдеу, шағын және орта кәсіпкерліктің қосымша ауыртпалығын болдырмау, автоматтандырылған есеп жүйесінің бәсекеге қабілеттілікті арттырудағы рөлін анықтау секілді өзекті сұрақтар әлі талқылануда.
Осы мәселелер мен жүйенің нақты жұмыс істеу тәртібі алдағы зерттеулер мен жарияланымдарда толық қарастырылады.
