WhatsApp 2026 жылдан бастап пайдаланушыларға телефон нөмірінің орнына пайдаланушының атын қолдану мүмкіндігін ұсынады. Жаңа жүйе мессенджерді бұрынғыдан да қауіпсіз әрі қолайлы етеді, деп хабарлайды digitalbusines.kz.
Жаңа мүмкіндік іске қосылғаннан кейін қолданушылар хабарлама жіберіп, қоңырау шалса да, өз нөмірін көрсетпей байланыса алады. Бұл жеке мәліметтердің қорғалуын күшейтіп, құпиялылықты жаңа деңгейге шығарады.
Қосымшада Business-Scope User ID (BSUID) деп аталатын бірегей идентификатор енгізіледі. Ол компанияларға клиенттермен телефон нөмірін білмей-ақ байланыс орнатуға мүмкіндік береді. Осылайша бизнес пен тұтынушы арасындағы диалог бұрынғыдан да қауіпсіз және сенімді болмақ.
Қазір бұл функция кеңейтілген сынақтан өтуде. Android жүйесіне арналған WhatsApp-тың 2.25.33.2 бета-нұсқасында пайдаланушылар контактілерді қолданушының аты арқылы іздеп, тікелей байланысу мүмкіндігін байқап көре алады.
WhatsApp бұл жаңашылдықты алғаш рет 2024 жылы таныстырған еді. Алайда жүйені түгел жаңарту қажеттілігіне байланысты толық енгізу мерзімі кейінге шегерілді. Инженерлер мессенджердің ішкі инфрақұрылымын қайта құрып, жаңа форматтағы байланысқа бейімдеп, қауіпсіздік пен шифрлау тетіктерін күшейтті.
BSUID әр қолданушыға жеке берілетін бірегей код ретінде жұмыс істейді. Бұл код веб-сұраулар мен хабарламаларда автоматты түрде көрініс табады. Пайдаланушы атауын қосу-қоспауына қарамастан, жүйе барлық операцияны осы идентификатор арқылы жүргізеді.
WhatsApp Business API пайдаланатын компаниялар 2026 жылдың маусымына дейін CRM жүйелерін және қызмет көрсету платформаларын жаңартып, телефон нөмірін тіркеу нүктесі ретінде қолданудан бас тартып, жаңа user_id форматына өтуі тиіс.
Компания мәлімдегендей, бұл жаңарту – жеке деректерді қорғауды күшейтуге бағытталған маңызды қадам. Алғашында корпоративтік аккаунттарға арналған бұл мүмкіндік 2026 жылдан бастап барлық қолданушыларға қолжетімді болады.
