Қазір кез келген қызметті бірнеше секундта атқаруға болатын дәуірде жапондар ойынды да жаңа деңгейге көтерді. Енді смартфон арқылы көкөніс егіп, дайын өнімді үйге алдыруға болады. Telefarm компаниясының Enkaku Bokujo жобасы ойын әлемі мен ауыл шаруашылығының арасын жалғап, телефон экранын нағыз егістікке айналдырады. Сіз онлайн отырғызған дақылдарды Жапониядағы фермер шынайы алқапта өсіреді.
Жобаның жұмыс тәртібі өте ұғынықты. Алдымен өзіңізге тиесілі шағын алқапты таңдайсыз, егіс түрін анықтап, ауа райын қадағалайсыз, қажет кезде бақшаңызды суарасыз. Бірақ экранда жасаған әрбір қимылыңыз шынайы алқапта жалғасын табады. Жапониядағы фермер дәл сіз таңдаған дақылды отырғызып, оған қамқорлық жасайды. Дақыл толық пісіп-жетілген сәтте өнім жинақталып, тікелей үйіңізге жөнелтіледі.
Ойын ішіндегі шағын әрекеттердің өзі нақты егісте жалғасын табады. Виртуалдық кеңістік бір сәтте шынайылыққа айналғандай әсер қалдырады.
Қызмет бағасы айына шамамен 500 иен, яғни үш доллар шамасында. Жоба әзірге тек Жапония аумағында қолжетімді. Қолданбада әркім өз қалауы бойынша редис егіп, қызанақ өсіре алады немесе жидек түрлерін таңдай алады. Өсімдіктің қалай өскенін экраннан көріп отыруға болады. Мезгіл-мезгіл жүйе хабарлама жолдап, мысалы, қызанақ гүлдеді немесе сәбіз пісе бастады деп хабарлайды.
Бұл жоба жай ойыннан әлдеқайда жоғары. Табиғаттан алыстаған қала тұрғынын жердің иісін сезіндіріп, егіншілікке жақындататын жаңа тәсіл. Токиодағы көпқабатты үйдің жоғарғы қабатында тұрсаңыз да, мегаполистің ортасында өмір сүрсеңіз де, өз бауыңызды күту енді арман емес.
Жоба авторларының айтуынша, олардың мақсаты – адам мен табиғаттың арасындағы байланысты жаңғырту. Қалада жер жетіспейтін, шағын телімнің өзі қомақты қаражатқа бағаланатын заманда өз фермасын жүргізу көпшілік үшін мүмкін емес еді. Енді оған бар болғаны смартфон мен күніне бірнеше минут жеткілікті.
Міне, заманауи технологияның нағыз қуаты осында. Ол тек күнделікті өмірді жеңілдетіп қоймай, адамды ежелден келе жатқан табиғи үдерістерге қайта жақындатады. Бұрын күрекпен атқарылатын еңбек қазір саусақтың бір қозғалысымен жүзеге асады.
Кейінгі жылдары ойындар адамның өзіне де, қоршаған ортаға да қамқор болудың жаңа құралына айналып келеді.
Enkaku Bokujo — көңіл көтеруден гөрі көбірек нәрсе береді. Бұл — виртуалдық қимылдардың нақты өмірге әсер ете алатынын көрсететін жаңа бағыт. Экранда құлпынай отырғызып, бір айдан соң күннің исі сіңген жемісті қолыңызға алу бүгінде ертегі емес.
Бәлкім, жақын болашақта біз ойын арқылы тек көкөніс егіп қоймай, үй тұрғызып, ас әзірлеп немесе ағаш отырғызуды да үйренерміз. Қазір ойын — тек ермек емес, шындықты қалыптастырудың жаңа тәсіліне айналып келеді. Мүмкін, мұндай жаңашыл жобаның қазақша нұсқасы да бір күні өмірге келер.
