Сатпаев қаласында онлайн-бизнесін дамытуға ұмтылатын кәсіпкерлерге арналған SMM (Social Media Marketing) курсы өз жұмысын бастады. Бағдарламаның негізгі мақсаты – қатысушылардың цифрлық дағдыларын жетілдіру және әлеуметтік желілер арқылы жобаларын тиімді насихаттауға мүмкіндік беру.
Курс спикері – «GZ білім орталығының» негізін қалаушы, тәжірибелі коуч және кәсіпкер Гүлнара Загирова. Оның жетекшілігімен қатысушылар тек теориялық білім алып қана қоймай, практикалық әдістер мен құралдарды игеріп, әлеуметтік желілерде бизнесін тиімді жүргізуді үйренеді.
Сатпаевтағы бұл курс Ұлытаудағы төртінші оқу бағдарламасы болып саналады. Бұған дейін оқыту аймақтың басқа қалаларында өтіп, қатысушылар тарапынан жоғары баға алған.
Жыл басынан бері осы бастама мен облыстық әкімдіктің қолдауымен 166-дан астам адам курстан өтті. Көпшілігі өз ісін ашып, алған білімдерін практикада қолдана отырып, кәсіптерін табысты дамытып келеді.
Ұйымдастырушылардың айтуынша, осындай білім беру бағдарламалары жастар мен белсенді кәсіпкерлер қауымдастығын кеңейтіп, бизнес пен цифрлық технология саласында өзін көрсетуге ұмтылатын азаматтарға жаңа мүмкіндіктер ашады. Сонымен қатар, бұл бастама аймақтың цифрлық экономикасын нығайтуға да септігін тигізеді.
