Қытайдың ірі технологиялық компаниясы – Alibaba жасанды интеллект саласында жаңа ірі тілдік үлгісін таныстырды. Бұл қадам Қытайдағы ІТ-алыптардың осы бағыттағы амбициясының артып келе жатқанын көрсетеді.
Жаңа Qwen-3-Max-Preview үлгісі триллионнан астам көрсеткішке ие. Бұл мамыр айында шыққан Qwen3 сериясының алдыңғы нұсқаларынан әлдеқайда қуатты. Жүйе Alibaba-ның бұлттық қызметтері мен OpenRouter платформасы арқылы қолжетімді. Компания өкілдері жаңа үлгінің қытайша-ағылшынша мәтіндерді өңдеуде, күрделі тапсырмаларды орындауда және көптілді жұмыстарды атқаруда мүмкіндігі артқанын айтады.
Ішкі сынақ нәтижелері бойынша, Qwen-3-Max-Preview бәсекелестерін басып озған. Атап айтқанда, ол MoonShot AI-дың Kimi K2, Anthropic компаниясының Claude Opus 4 және DeepSeek V3.1 жүйелерінен бес түрлі сынақта алға шыққан. Дегенмен бұл көрсеткіштер әзірге тәуелсіз сарапшылармен расталмаған. Сондай-ақ, жаңа үлгі ашық кодқа ие емес, бұл Alibaba-ның бұған дейінгі тәжірибесіне сәйкес келеді.
Бағасына келсек, Qwen-3-Max-Preview қолданушыларға арзанға түспейді. Бір миллион кіріс дерегін өңдеу құны – 0,861 доллар, ал бір миллион шығыс дерегі үшін – 3,441 доллар. Бұл оны Qwen сериясындағы ең қымбат жүйелердің біріне айналдырады. Мысалы, бұған дейінгі Qwen3-235B үлгісі тиісінше 0,287 және 1,147 доллар болған.
Компания алдағы үш жылда жасанды интеллект инфрақұрылымын дамытуға 52 миллиард доллар инвестиция салуды жоспарлап отыр. Бұл соңғы он жылдағы жалпы шығындарынан да көп. Сонымен қатар Alibaba өз чиптерін жасап, Nvidia-ға тәуелділікті азайтуды көздеп отыр.
Бұл бастама Alibaba-ның әлемдік жасанды интеллект нарығындағы ықпалын күшейтіп, қытайлық технологиялардың бәсекеге қабілетті екенін тағы бір мәрте дәлелдейді.
