Солтүстік Каролина штаты университетінің ғалымдары зерттеу жұмысын 10 есе тез жүргізетін жаңа технологияны ұсынды. Бұл әдіс химия мен материалтану салаларындағы сынақтарды арзанырақ, экологияға зиянын азайтып әрі бұрынғыдан әлдеқайда жылдам жүргізуге жол ашады. Жүйе нақты уақыт режимінде үздіксіз мәлімет жинап, сол сәтте талдауға негізделген.
Мұндай зертханалар – адамның араласуынсыз жұмыс істейтін, машиналық оқыту мен автоматтандыруға негізделген роботтандырылған жүйелер. Олар химиялық тәжірибелерді өздігінен жүргізіп, алынған нәтижеге қарап келесі қадамды жоспарлап, зерттеу мақсатына жақындай береді.
Бұған дейін мұндай зертханалар реагенттерді араластырып, арнаулы арна арқылы өткізіп, тек реакция аяқталған соң ғана өнімді талдайтын. Бұл әдіс әр тәжірибеден кейін үзіліс қажет ететіндіктен уақытты көп алатын. Тіпті, кейде бір ғана реакцияға бір сағатқа дейін кететін.
Жаңа тәсілде реакция үздіксіз жүріп, талдау сол сәтте қатар жасалады. Мұндай динамикалық жүйе тек процесті жылдамдатып қоймай, көп мәлімет алуға да мүмкіндік береді. Мысалы, бұрын реакция басталған соң 10 секундтан кейін бір ғана мәлімет алынатын болса, енді әр жарты секунд сайын 20 түрлі көрсеткіш тіркеледі. Яғни зерттеушілер жекелеген сәттерді емес, бүкіл процестің толық көрінісін бақылап отырады. Бұл бір суретке қарап шешім қабылдағаннан гөрі, бүкіл фильмді көріп отырғанмен тең.
Бұрын тәжірибелер бірінен соң бірі жүргізіліп, әрқайсысы жеке тексерілсе, енді жүйе үздіксіз жұмыс істеп, әрбір кезеңде мәлімет жинап, бір уақытта үйреніп отырады.
Мұндай көлемді деректер машиналық оқыту алгоритмінің дәлдігін арттырады. Нәтижесінде жүйе оңтайлы материалдар мен процестерді жылдамырақ табады, артық тәжірибе қажет болмайды, қолданылатын химиялық заттар да азаяды. Бұл ресурстарды үнемдеп, қалдықтардың азаюына сеп болады.
Жаңа әдіс сынақ кезінде бұрынғы тәсілдермен салыстырғанда 10 есе көп мәлімет жинады және оқыту процесінен кейін бірден ең тиімді материалды анықтай алды.
