Meta компаниясы жасанды интеллектіге (ЖИ) арналған әлемдегі ең ірі дата-орталықтардың бірін салуды жоспарлап отыр. Жоба шеңберінде Луизианада орналасатын Hyperion атты жаңа дата-орталықтың қуаты 2030 жылға қарай 2 ГВт-қа жетіп, кейін 5 ГВт-қа дейін ұлғаяды деп күтілуде.
Компанияның айтуынша, бұл орталықтар алдыңғы қатарлы генеративті ЖИ үлгілерін дайындап, оларды дамыту үшін қажет есептеу қуатын қамтамасыз етеді. Алғашқы Prometheus деп аталатын суперкластер 2026 жылы іске қосылмақ. Сонымен қатар, Titan кодымен белгілі тағы бір кластер Манхэттеннің жарты аумағындай кеңістікті қамтиды.
Meta Superintelligence Labs деп аталатын жаңа зертхананы басқаратындар қатарында Scale AI компаниясының экс-басшысы Александр Ван мен GitHub-тың бұрынғы CEO-сы Нат Фридман бар. Meta бұған қоса Scale AI-ға 14,3 млрд доллар инвестиция құйып, Apple, OpenAI және Anthropic сияқты алпауыттардан жетекші мамандарды тартты.
Цукербергтің айтуынша, компания ең қуатты инфрақұрылымды құрып қана қоймай, «саладағы ең дарынды команданы» жинап жатыр. Кейбір мамандарға ұсынылып жатқан келісімшарттардың сомасы 100 млн долларға дейін жетеді.
