Мақаланың жалғасы
2016 — Қаланың астымен кептеліссіз өмірге жол ашу
Илон Масктың кезекті тосын идеясы тағы да жұртты таңғалдырды. Бұл жолы ол аспанға емес, жер астына бағыт алды. The Boring Company — көлік кептелістерін азайтуды көздейтін жаңа бастама. Аты айтып тұрғандай, бұл — жерасты жолдарын қазуға арналған жоба.
2016 жылдың 17 желтоқсанында Илон Маск Twitter парақшасында қаладағы бітпейтін кептелістерден шаршағанын айтып: «Жерасты жолын қазатын құрылғы құрастырып, іске кірісемін» деп қалжыңдай жазды. Алайда көп ұзамай шынымен әрекетке көшкенін айтып, жаңа компания құрғанын мәлімдеді.
Масктың ойынша, АҚШ-тағы ұзақ кептелістерді жерасты жолдары арқылы шешуге болады. Бұл жоба метрополитен мен автожолдың арасындағы тың шешімге айналмақ. Компания автокөліктер жүретін жерасты жолдарын электрлі қоғамдық көлік жүйесімен біріктіруді көздейді.
Қазірдің өзінде Калифорнияда (1,15 миль) және Лас-Вегас орталығында бірнеше жерасты жолы салынған. Жобаның басты мақсаты – жасанды интеллектіні қауіпсіз әрі этикалық тұрғыда пайдалану арқылы технологияны басқаруға икемді ету (Vegas Loop жобасы).
2019 – «Көліктің әсемдігінің 80 пайызы — оның дөңгелегінде», – дейді Маск.
Кейбіреулер оны «темір қалқан жамылған көлік» десе, енді бірі «техноапокалипсис салт аттысы» деп атайды. Cybertruck — көлік қана емес, өнер туындысы іспетті. Ерекше пішінімен көзге түскен бұл темір тұлпар алғаш рет 2019 жылы көпшілікке таныстырылды. Алайда оның идеясы 2012 жылдан бері пісіп-жетілген болатын. Маск сол кезде-ақ америкалық жолдарды бағындыруды мақсат еткен еді.
Tesla Model Y көлігі жарық көрген соң, Маск жүккөліктің эскизін жариялап, оның «киберпанк» стилінде жасалатынын айтты. Сол жылы-ақ Cybertruck-тың алғашқы үлгісі жұрт алдына шықты.
Алайда алғашқы кезеңде бірқатар техникалық олқылықтар анықталды. «Тот баспайтын болаттан жасалды» деген корпус уақыт өте келе бетіне тот түсе бастаған. Кейбір көліктердің өздігінен отқа орануы да тіркелді. Дегенмен, жанкүйерлер үмітін үзген жоқ. Масктың бұл жобасы әлі де америкалық жолдарды жаулай алады деген сенім бар. Ал Мәскеудің Патриаршие тоғандарында бұл көлік әлдеқашан көзге түсті.
2025 жыл. Тағы бір тосын жаңалық. Тағы да жылдам, тағы да озық. Бірақ бәрінің шегі бар емес пе?
Илон Масктың ең жаңа жобасы туралы ақпарат осы жылдың мамырында белгілі болды. Colossus деп аталатын компания ауқымды жобаның алғашқы кезеңі толық қуатында іске қосылғанын хабарлады. Бұл жүйеде 200 мың Nvidia графикалық процессоры жұмыс істейді. Оның тұтынатын қуаты – 250 мегаватт. Бұл көлемдегі энергия АҚШ-тағы шамамен 300 мың үйге жарық беруге жеткілікті.
Colossus – жасанды интеллектіні үйретуге арналған, әлемдегі ең ірі суперкомпьютер. Масктың болжамынша, оның стартапы жақын болашақта адамнан да ақылды жасанды интеллект жүйесін іске қоспақ.
Бүгінде Илон Маск — 53 жаста. Демек, оның алдында әлі бірнеше онжылдық, ондаған жаңа жоба, жүздеген инвестиция мен миллиардтаған қаржы күтіп тұр. Қазірдің өзінде АҚШ-тың өмірі оның технологияларынсыз елестетілмейді. Ал цифрлық серпіліс пен техникалық дамудың толқыны енді бүкіл әлемге жайыла бастағандай.
Интернет, «ақылды үйлер», тіпті қарапайым теміржол жүйесінің өзі біртіндеп жаңа дәуірге қадам басып келеді. Университеттегі курстық жұмыстар мен күнделікті кеңсе тапсырмалары да жасанды интеллекттің көмегінсіз орындалмайтын жағдайға жетті. Бірақ, соған қарамастан, адамзат әлі де үмітін үзбей, технологияға толық тәуелді болмаймыз деген сеніммен өмір сүруде.
Мүмкін, адам мен жасанды сананың арасында тепе-теңдік орнатып, екеуінің шекарасын айқын белгілей алатын тұлға — Илон Маск болар. Жасанды интеллект дамыған сайын, адамзаттың болашағы да сол технологияға тәуелді бола түсті. Бірақ оны кім бағыттайды? Қай бағытқа?
Маск бұл жайлы бір сөзінде:
«Көп адам өзгерісті ұната қоймайды. Бірақ біз оған бейімделуді үйренуіміз керек. Өйткені өзгерістен бас тарту — түптің түбінде апатқа алып келуі мүмкін», — деген еді.
Дереккөз: yablor.ru/blogs/milliarder-geniy-pleyboy-filantrop-/8123390
