Nissan компаниясы Silence серіктестігімен бірлесіп, қалалық өмірге арналған S04 Nanocar электрокөліктерінің төрт жаңа моделін таныстырды.
Жаңа үлгілер Nissan-ның Еуропадағы ресми серіктестері арқылы сатылады. Олардың қатарына мына көліктер енген: Silence S04 L6e Unico – бағасы 10 000 еуродан аспайтын бастапқы деңгейдегі нұсқа; Silence S04 L6e Vivo – жайлылығы арттырылған жетілдірілген модель; Silence S04 L7e Plus – қуаты мен қозғалыс ұзақтығы күшейтілген нұсқа; және Silence S04 Cargo – L6e мен L7e түрінде шығарылатын, қала ішінде жүк тасуға арналған шағын көлік.
Unico үлгісі бір қуатпен 100 шақырымға дейін жүре алады және артқы көрініс камерасымен жабдықталған. Vivo нұсқасы 7 дюймдік TFT-экранмен, жетілдірілген тежегіш жүйесімен және қоңырауларды басқаруға арналған көпфункционалды рөлмен толықтырылған. Екі L6e үлгісі де 6 кВт (8,1 а.к.) қуатқа ие, ең жоғары жылдамдығы – 45 км/сағ. Оларды, ел заңнамасына байланысты, 14 жастан бастап басқаруға болады. Ал L7e Plus қуаты 14 кВт (19 а.к.) болып, 85 км/сағ жылдамдықпен жүре алады.
Барлық S04 үлгілері ауа райынан қорғайтын жылы салонымен, кондиционер және жылыту жүйесімен, кәдімгі тұрмыстық розеткадан қуатталатын алынбалы батареяларымен, ықшам әрі ыңғайлы басқаруымен ерекшеленеді. My Silence қосымшасы арқылы автокөліктің орнын бақылауға, кілтсіз ашуға және бағыт жоспарлауға болады.
Қала кәсіпорындарына арналған Cargo үлгісінің жүксалғыш көлемі 414 литрді құрайды. Ол соңғы шақырымдағы жеткізу, қызмет көрсету және басқа да коммерциялық міндеттерге бейімделген.
Осы жазда Acciona мен Nissan Францияның Париж қаласы мен өзге өңірлерінде батареяны жылдам ауыстыру бекеттерін сынақтан өткізуді бастамақ. Бұл бекеттер Nissan дилерлерінде, жанармай бекеттерінде және қоғамдық автотұрақтарда орнатылады. Олар арқылы қуаты таусылған батареяны толық қуатталғанымен 30 секунд ішінде ауыстыруға болады. Battery as a Service (BaaS) моделі бастапқы шығындарды айтарлықтай азайтып, батареяны жеке күтіп ұстау қажеттілігін жояды. Испанияда Silence 160 ауыстыру нүктесін іске қосқан, жыл соңына дейін бұл көрсеткіш 200-ге жетпек. Сондай-ақ, тұтынушыларға батареяны жалға алу мүмкіндігі ұсынылады – екі батареясы бар үлгілерде бұл шешім 2 000 еуроға дейін үнемдеуге көмектеседі. Бірінші жыл тегін.
