АҚШ, Ұлыбритания және Еуропа елдері алдағы жылдары уран тапшылығына тап болуы мүмкін. Себебі әлемдік нарықта дәл осы стратегиялық шикізат үшін бәсеке күшейіп келеді. Financial Times басылымының жазуынша, Қазақстан уран жеткізілімінің басым бөлігін Ресей мен Қытайға бағыттап, Батыс елдеріне бөлінетін үлесін азайтуда.
Сарапшылардың болжамынша, алдағы онжылдықта атом энергиясына қажеттілік еселеп өседі. Бүкіләлемдік ядролық қауымдастықтың деректеріне сүйенсек, 2040 жылға қарай уранға деген сұраныс екі есе артуы мүмкін. Бұған бірнеше фактор әсер етуде:
Жасанды интеллект пен деректерді өңдеу орталықтарының көбеюі – бұл салалар қуат көзін көп қажет етеді.
Көмірсутекті отыннан бас тарту үрдісі – экологиялық таза энергия көздеріне, соның ішінде атом энергетикасына бетбұрыс жасалуда.
АҚШ пен Ұлыбритания 2050 жылға қарай әлемдегі атом энергетикасының қуатын үш есеге арттыруды көздейді. Алайда Қазақстан уран өндірісінің негізгі бөлігін Шығыс нарығына бағыттап жатыр.
Бұл өзгерістер Францияның Orano компаниясына да әсер етуде. Қазақстандағы ескі кен орындары таусылып, жаңа жобалардың көбі Ресей мен Қытайдың бақылауына өтуде.
Berenberg инвестициялық банкі сарапшыларының пікірінше, Қазақстанның стратегиялық бағыты уран бағасының қымбаттауына және Батыс елдері үшін балама жеткізушілер табудың қиындауына әкелуі мүмкін.
Әлемдегі ең ірі уран өндіруші ел ретінде Қазақстанның ұстанымы бұл нарықта шешуші рөл атқарады. Ал Батыс елдері шикізат тапшылығын еңсеру үшін қандай қадам жасайды? Бұл – алдағы жылдардағы басты сауалдардың бірі.
