Сатылым ақпан айының соңына дейін басталады.
Apple компаниясы көптен күткен жаңартылған iPhone SE моделін осы аптада таныстыруды жоспарлап отыр. Бұл туралы Bloomberg журналисі Марк Гурман сенімді дереккөздерге сілтеме жасап хабарлады.
Компания жаңа құрылғыны келесі аптада жариялауды көздеп отыр, ал сатылымдар ақпанның соңына дейін басталады. Алайда Apple бұл жолы арнайы таныстырылым өткізбей, жаңа iPhone SE туралы ақпаратты ресми сайтында жариялауы мүмкін. Бұған дейін инсайдерлер құрылғы сәуір айында таныстырылады деп болжаған еді.
iPhone SE 2022 үлгісі бүгінде ескіргені анық. Бұл – Home батырмасы сақталған және Face ID технологиясы жоқ жалғыз iPhone моделі. Ал жаңа нұсқа iPhone 14 дизайнына ұқсас болып, Apple Intelligence жүйесін қамтиды.
Қазіргі iPhone SE модельдерінің қоры АҚШ-тағы Apple дүкендерінде таусыла бастаған. Бұл – компанияның жаңа құрылғыны шығаруға дайындалып жатқанының белгісі. Apple-дің бірнеше дүкеніндегі қызметкерлер қордың азайып жатқанын растаса, кейбір сатып алушыларға қажетті модельдер болмағандықтан, сатып алудан бас тартуға тура келген.
Қазіргі таңда iPhone SE интернет-дүкенде әлі де қолжетімді. Алайда кейбір нұсқалары – 256 ГБ жадысы бар қызыл түсті модель – тек наурыз айында жеткізіледі. Сондай-ақ iPhone 14 және 14 Plus модельдерінің қоры да азайып келеді.
