Қазақстанның Денсаулық сақтау министрлігі аурухана парақтарын және уақытша еңбекке жарамсыздық туралы анықтамаларды беру ережелеріне өзгерістер енгізуді жоспарлап отыр. Жаңа ережелердің негізгі мақсаты – қағаз құжаттардан толық бас тартып, цифрлық форматқа көшу арқылы процестерді оңтайландыру, деп хабарлайды digitalbusiness.kz.
Қазіргі таңда аурухана парақтары электронды және қағаз түрінде беріледі. Алайда жаңа ережелер бойынша толығымен электронды форматқа көшу көзделіп отыр. Денсаулық сақтау министрлігі өкілдерінің айтуынша, бұл қадам азаматтардың медициналық мекемелермен және мемлекеттік органдармен өзара іс-қимылын жеңілдетеді.
Жаңа бұйрық жобасы «Ашық НҚА» платформасында талқылануда. Құжат 3 ақпанға дейін қаралуда.
