Қазақстанда электронды цифрлық қолтаңба (ЭЦҚ) мемлекеттік және басқа да қызметтерді онлайн пайдалануға мүмкіндік береді. Бүгінде цифрландырудың арқасында мемлекеттік қызметтердің 90%-ға жуығы онлайн қолжетімді.ЭЦҚ ашу арқылы жеке кәсіпкерлік (ЖК) немесе жауапкершілігі шектеулі серіктестік (ЖШС) құруға, электронды саудаға, тендерлерге, мемлекеттік сатып алуларға қатысуға, лицензиялар мен рұқсаттарды алуға, сот органдарына өтініш беруге және Жоғарғы Сот сайтынан қажетті істерді іздеуге, сондай-ақ мемлекеттік органдар мен онлайн қабылдау бөлмелеріне өтініш жіберіп, анықтамалар мен құжаттарды кез келген уақытта алуға болады.
Сонымен қатар, ЭЦҚ салықтық және статистикалық есептерді тапсыруға, тұрғын үй кезегін тексеруге, медициналық сақтандыру мәліметтерін білуге және тағы басқа көптеген қызметтерді қашықтан пайдалануға жол ашады.
ЭЦҚ рәсімдеу үшін жеке куәлік немесе паспорт қажет. Қашықтан алу үшін келесі қадамдарды орындау керек:
- Электрондық үкімет порталына кіріңіз. Тіркеуді бастамас бұрын, жеке куәлігіңіз, мобильді телефоныңыз, веб-камерасы бар компьютеріңіз және NCALayer бағдарламасы болуы қажет. Егер бағдарлама орнатылмаған болса, жүйе оны жүктеуді ұсынады.
- «ЭЦҚ-ны қашықтан алу» бөлімін таңдаңыз. Қолтаңба түрін және оны қолданатын тұлғаны көрсетіңіз (жеке немесе заңды тұлға).
- Жеке деректерді енгізіңіз. Берілген электрондық нысанды толтырып, өтінішті жіберіңіз.
Маңызды жайт: ЭЦҚ тіркеу кезінде деректеріңіз Мобильді азаматтар базасында (МАБ) болуы керек. Егер бұрын тіркелген болсаңыз, жүйе бейне тексеру арқылы деректеріңізді растайды. Тіркелмеген жағдайда, бұл мәселені виртуалды көмекші арқылы шешуге болады.
Барлық деректер расталғаннан кейін, Digital ID арқылы сәйкестендіруден өту қажет. Бұл үшін веб-камера пайдаланылады. Сәйкестендіру аяқталған соң, жүйе сізді Қазақстан Республикасының Ұлттық куәландырушы орталығының (ҰКО) бетіне бағыттайды.
Порталда келесі қадамдарды орындаңыз:
-Мобильді телефон нөмірін және жеке куәлік деректерін тексеріңіз.
-Жеке деректерді өңдеуге арналған келісімге қол қойыңыз.
-ЭЦҚ кілттерін сақтау орнын және жолын таңдаңыз.
Соңғы қадам – өтінішті жіберу және оның мәртебесін жаңарту. Барлық процесс шамамен 10 минутты алады.
Осы қадамдардан кейін ЭЦҚ сертификаттарын жүктеп алып, бірден қолдануға болады.
Александр Новохрост
