Қытайдың BYD компаниясы небәрі бес айдың ішінде Yangwang U9 электр көлігінің алғашқы 100 данасын жеткізгенін хабарлады.
2024 жылдың ақпанында таныстырылған Yangwang U9 премиум электр көлігі бағасы 233 000 долларды құрайды. Алғашқы жеткізілімдер тамыз айының соңында басталды. Көліктің ұзындығы – 4966 мм, ені – 2029 мм, биіктігі 1295–1338 мм аралығында, ал дөңгелек базасының ұзындығы – 2900 мм.
Көліктің стандартты жинағына көміртекті материалдардан жасалған төбе мен артқы диффузор кіреді. Сатып алушылар үшін үш ерекше түстің таңдауы ұсынылған: күміс реңк Moonlight Silver, қою күлгін Argyle Purple және ерекше Chixia Danzhu түсі. Бұл реңктер көліктің премиум мәртебесін айқын көрсетеді.
BYD e4 платформасы негізінде жасалған көлік Disus X аспа жүйесімен жабдықталған. Бұл жүйе көліктің ерекше қозғалыс үлгілерін көрсетуіне, мысалы, кедергілерден икемді секіріп өтуіне немесе үш дөңгелекпен жүруіне мүмкіндік береді. Көлік төрт электрқозғалтқышпен жабдықталған, олардың жалпы қуаты 1287 ат күшін, ал айналу уақыты 1680 Нм құрайды. Ол 0-ден 100 км/сағатқа дейінгі жылдамдықты небәрі 2,36 секундта ала алады.
Бұған дейін BYD компаниясы аталмыш көліктің ерекше мүмкіндіктерін көрсететін бейнеролик жариялаған болатын. Онда Yangwang U9 су толы шұңқырлар мен жолдағы кедергілерді еркін еңсеріп, өзіндік басқару жүйесінің жоғары деңгейін көрсетті.
